بيان رقم 9 .. سوق العصر .. the social Network .. (:

ا

لانترنت هو وسيله الاتصال بين البشر والي عن طريقها بتتدفق المعلومات والثقافه علي مدار الساعه لينهل منها الجميع .. 

طبعا الكلام ده كله خرف .. وكلنا بنقعد عالنت  وعارفين الدنيا ماشيه ازاي .. 

النت عند الشعب المصري منقسم ل4 شرايح

1- جزء مش هينفع نتكلم عنه دلوقتي ... (فاهمني انت طبعا ;)  ) ودول بيمثلو 95 % من رواد الشبكه العنكبوتيه .. ( حاجه زي الحزب الوطني كده )

2- دول بقي ناس عندهم فراغ عاطفي .. وبيدخل علي النت عشان يحاول يشقط واحده ( وده طبعا بعد محاولات فاشله في الاحتكاك المباشر ) وغالبا ربنا بيوفقه في حته من المغرب او تونس او الفلبين ... نسبه قليله منهم بيسافر للحته الي شقطها وبيتجوزا ويعيشو في تبات ونبات ودول غالبا بتبقي الحته عمرها الافتراضي خلص وبتلعب في 70 - 80 سنه كده .. دول نسبتهم حوالي 40 % متداخلين مع الشريحه الاولي .. 

3- دول بقي الشباب الي فاكرين نفسهم احمد عرابي ورفاع الطهطاوي .. وتقدر تعرفهم من صورة بروفايل الفيس بوك ( راجل ااقرع وعنده شنب ومعمول عليه علامتين صح ) او اي شعار تاني مناهض للحزب الحاكم  .. زي لا للتوريث ومصر كبيره عليك والخرف ده كله .. وعلي طول مشير لينكات لناس الحكومه قفشتهم او ناس الحكومه اتقتلهم .. او ناس الحكومه **** .. النسبه هنا 13 % بنسبه تداخل بردو مع الشريحتين الي فوق لكن بدرجه ااقل شويه  ... 

4- ناس محترمه وكباره .. المهم عنده الكتب الدينيه والمحضرات للشيوخ المختلفه ... بيتميز بالهدوء النسبي واغلب الشير بتاعه للشيخ محمد حسان ومحمد حسنين يعقوب .. دول نسبه 2 % مع تداخل بسيط مع الشريحه التالته فقط ( وش يعني الراجل محترم ملوش في الهتش ده )

هنا بقي عايز اتكلم عن اختراع عظيم جدا .. الا وهو ال facebook 

عشان افهمكم الليله فيه ماشيه ازاي هدخل دلوقتي علي بروافايل اي حد من الناس الي عندي ونشوف هو كاتب ايه  .. 

------------------------------------------------------

hamada bay7b lolo عملت المستحيل علشان انسااااااك وحيش حياتي من غيرك ....لقيت من المستحيل انسى هواااك وحياتي صعبة من غيرك.....حاولت انسى واهرب روحي واعيش حياتي مع حد تاني مقدرتش انسى ....اتاريك يا روحي عمري وحياتي وذكرياتي

 

November 30 at 6:46pm · · Comment · View Feedback (9)Hide Feedback (9)

banota batbota  : الله .. احساسك جامد قوي يا حماده .. انت كده ازاي ! November 30 at 9:26pm ·  

lolo 3asola حلوة اوى يامعلم وهاخدها كوبى واعملها انا كمانNovember 30 at 9:26pm ·  

wa7ed re5m ايه يا عم اللطيف فاكر نفسك عبد الحليم حافظ ياخي ****November 30 at 9:26pm 

ana bent 5alo  جميله قوي يا حموزه .. ربنا يخليكو لبعض ويسعدكوا علي طول  November 30 at 9:26pm ·

--------------------------------------------------------------

وهكذا ممكن نقعد للصبح عشان عن حماده كتب ام الاغنيه الي ملهاش معني دي .. وطول النهار بقي شير لاغاني وكلام ملوش صنف اللازمه للصبح ... ده طبعا غير قصايد صلاح جاهين والاخطل ونزار القباني .. وهو اصلا ساقط في العربي بتاع تانيه ثانوي

عشان كده ومن موقعي هذا .. فانا بانشاد الاستاذ حماده والساده المسئولين .. ارحمنا ياعم الحاج عشان ربنا يرحمك .. وشكرا ... (: