السبت، ٢٥ ديسمبر ٢٠١٠

بيان رقم 16 .. حرما يا حج ...


السلام عليكم ورحمه الله وبركاته ... السلام عليكم ورحمه الله ..

سبحان الله والحمد لله ولا حول ولا قوة الا بالله ..اللهم آتي نفوسنا تقواها وزكها أنت ..

- حرما يا حج ...

- استغفر الله العظيم من كل ذنب عظيم .. الله لا تؤاخذنا بما فعل السفهاء منا .. اللهم ما..

- بـــابااااااااا ...

- بابا ! بذمتك مش مكسوف وانت هلف زي الحيطه كده وبتقول بابا ! يابني انا وانا ادك كنت مخلف اخوك محمد .. انت جبله ياد مبتحسش ؟!

- يا بابا انت لسه مصلي اتقي الله في ابنك ..

- هيقولي بابا تاني ... 

- امال ااقولك ايه بس مانت مكتوب في البطاقه ابويا انا جبت حاجه من عندي !

-  بص متقولش اي حاجه .. لو عايز رضا ابوك عنك سبني في حالي واخفي من وشي ..

- طيب حاضر هخفي .. بس عايز منك فلوس الاول .. 

-فلوس ! انا مش لسه مديك 5 جنيه اول امبارح ! لحقت تخلصها 

- 5 جنيه ايه يا با .. ااااه قصدي يعني انا عايز فلوس الكورسات عشان الدكاتره حلفوا ليعلقوا العيال الي مادفعوش فلوس الكورس ..

- كور ايه يا خويا ؟ باسم الله ما شاء الله انت بتاخد كورسات كمان ... انت بقالك كام سنه في الكليه ياد ؟ 

- ليه الاحراج ده بس .. 

- احراج .. هو انت بتحس يا بعيد ولا بتنكسف علي دمك .. احمد ربنا اني لسه باكلك اصلا .. 

- انت كمان مش عايز تاكلني .. الله يسامحك يا عم .. محسسني اني كل يوم باتغدي سيمون فيميه وبليل بتعشي جبنه ميلكانا .. 

- لو مش عاجبك عيشتنا ياخويا انزاح وريحني وريح نفسك .. 

- لا يا عم متهونش عليا اسيبك .. انت مهم كان ابويا بردو ... المهم انا عايز الف وخمس .. قصدي الفين جنيه ... 

- ****** ده انا متجوز امك باتنين وعشرين جنيه !

- طيب ايه رايك اديك انا متين وعشرين جنيه وتجوزني ؟! 

- ومالو يا حبيبي اجوزك هو انا عندي اغلي منك .. اخفي من وشي دلوقتي وبكره الصبح ان شاء الله هتلاقي عروستك تحت السرير .. مبسوط ! 

- سرير ايه يا بابا هو انا هتجوز شمبانزيايه .. انا عايز الفلوس ورايا مزاكره ...

- قال يعني قوي الواد فالح .. عوض عليا عوض الصابرين يا رب .. 

- يا بابا انت المفروض تفتخر بيا .. حد طايل اليومين دول يبقي عنده عيل في صيدله ودكتور قد الدنيا .. 

- دكتور الندامه ياخويا جتك البله فيك وفي منظرك .. ده انت حتي مش عارف تديني الحقنه ومعري ابوك كل يوم قدام الغريب ..

- الفلوس يا حج الله يكرمك .. 

- روح خد من امك هي معااها فلوس علي قلبها قد كده .. ( طبعا ابويا هارش اني قلبت امي في الفلوس قبل ماعدي عليه ) 

- سالتها مش معاها .. 

- ولا انا معايا .. 

- يا عم مانت معاك الفلوس علي قلبك قد كده .. يلا بقي عشان ورايا مزاكره والعيال مستنيني تحت .. 

- وهتزاكروا في انهي غرزه ان شاء الله ؟ 

- غرزه العراقي .. . قصدي في بيت احمد العراقي صاحبي ..

- طيب بص يا عم الخفيف .. انت اخرك معايا 200 جنيه .. اديهم للاستاذ الي بيديك وقوله يبوس ايده وش وضهر .. 

- استاذ ! 200 ! ايه يا عم انت فاكرني شغال صبي مكوجي ! انا عايز فلوس الكورس عشان اعرف اخد ورق المراجعه منه .. 

- دقيقه كمان وال 200 هيبقوا 20 .. 

- يا بابا بس .. 

- بابا .. طيب وغلاوه امك عندي مهتاخد غير 100 

- هات يا عم ال 100 وامري لله .. حسبي الله ونعم الوكيل ...

الاثنين، ٢٠ ديسمبر ٢٠١٠

بيان رقم 15 ... اول خطوة في طريق الضياع .. (:


النهارده كان يوم تااااااااريخي في مسيرتي الممتده ل 17 سنه مع التعليم ... كان عليا النهارده امتحان ماده ال applied ودي امتداد لماده متخلفه عقليا اسمها العقاقير .. حاجه كده ملهاش صنف اللازمه في الحياه .. بندرس فيها النباتات الطبيعيه الي بيتصنع منها الادويه ... بندرس كل حاجه عن النبات ده الا الحاجات الي ممكن تستفيد بيها ... النبات ده بينزرع فين .. مين عم الحاج الي زرعه .. اتقص ازاي .. اتنشف ازاي .. وحجات خرف علي هذا المنوال ... طبعا انا عندي تاريخ مشرف مع امتحنات العملي .. متفهمش بيحصلي ايه جوة لجنه الامتحان .. المهم انا قولت ايه انا هبيع القضيه ... وهرمي تكالي علي الله .. حليت حليت ... محلتش اهو مفيش جديد بردو وانا متعود علي كده ... 

اول لما دخلنا المعمل جريت بسرعه علي العامل .. 

- عم عاطف حبيب قلب امي .. ازيك يا كبيرنا منور والله .. 

-الله يكرم اصلك يا دوكتور .. ايه مزاكر ولا زي كل مره .. 

- لالا متخافش مزاكر .. بس بردو انت البركه بتاعتنا .. 

- ماشي يا دوكتور .. اول لما تتزنق اهرش بس في دماغك .. وهتلاقيني في قفاك علي طول وهقولك البودر الي معاك ايه .. 

- حبــــــــــــــــــــــبيب قلبي يا عم عاطف والله ... انت المفروض تبقي معيد مش عامل والنعمه .. 

سبت عم عاطف بعد مظبطت الاداء ودخلت في البنش في المكان الي همتحن فيه .. 

دقيقه كده ولقيت معيد بيان علي وشه غضب ربنا قال بصوت اجش كده .. ااقفلو البااااااااااب .. ومتدخليش حد تاني انا استكفيت خلاص .. اطفي النور يابني وشدوا الستاير ... 

انا سمعت الكلمه دي روحت ماسك البنطالون وقلت بناقص ام ال40 درجه .. بس الواحد يطلع بشرفه من المعمل 

- شغل البروجيكتور يابني في يومكوا الاسود ده .. الله يخربيت دي شغالنه علي الي عايز يشتغلها

سبت البنطالون وقولت الحمد لله انا ظلمت الراجل .. المهم المفروض هيعرض علي البروجيكتور 3 سبوتات واحنا هنتعرف عليهم ونكتب تاريخ كل واحده من ساعت مزرعوها لحد معصروها ... 

- شغل اول سبوت يابني ... 

لسه برفع دماغي عشان اشوف لقيت المعيد الرخم بيقول .. غـــــــــــــــــــــير .. 

بصيت للواد الي علي يميني لقيته كاتب Rhubarb .. بصيت عالواد الي علي الشمال لقيته كاتب Ginger  .. روحت هرشت في دماغي كده وبعدين قولت يلا .. ورحت خابطها liquorish 

لسه جاي بكتب المعلومات بتاعت السبوت لقيت عم عاطف جه .. قولتله خير يا عم عاطف .. قالي انا لقيتك بتهرش قولت يبقي انت مزنوق .. قولتله لا يا عم عاطف انا بهرش عشان دماغي فيها صراصير بعيد عنك .. اتكل بقي عشان مش فاضي لامك .. 

السبوت الي بعدها كانت حاجه عجيبه كده شبه اللوح بتاعت فن جوخ .. متفهملهاش اول من اخر .. ببص عالواد الي علي يميني لقيته بيبصلي .. ببص للي علي شمالي لقيته بيبصلي هو كمان .. قولتلهم خلاص يا جدعان انتوا هتصوروني .. بناقص 5 درجات يعني .. 


السبوت التلته بقي ربنا كرمني وعرفتها .. بس مكنتش فاكر الاستخدمات بتاعتها ايه .. بصيت حوليا كده ملقتش حد غير الواد محسن الرخم .. الواد ده دمه تقيييييييييل بغباء بس الصراحه دماغه نضيفه وواد دحاح .. قولت معلش  اللي تكره وشه يحوجك الزمان لقفاه ..

- محسن .. يا محـــــــــــــــــــــسن .. محسن .. رد يابن الجزمه انا عارف انك سامعني  .. 

- عايز ايه يا عم زفت ...

- انت كان عليك 4 جنيه بتوع ال flask الي انت كسرتهالي ومدفعتهمش لحد دلوقتي ... 

- فلاسك ايه الله يخربيتك ده وقته .. 

- طيب بص .. قولي ال uses  بتاعت السبوت التلته ونبقي خالصين .. 

- اه يا نتن يابن ال **** ماشي يا عم اكتب .. 


وراح ملاني البتاعه زي الكتاب مبيقول ...

.. المهم خلصنا العك الي في الاول ده ودخلنا علي البودرات .. المفروض بينزل 4 بودر كل 2 mix  مع بعض .. في بودرات بتبان من شكلها وريحتها وفي حجات لازم تشوفها تحت الميكرسكوب ( المفروض يعني ) بس غالبا انتو لو معرفتوش من بره يبقي كل سنه وانت طيب وتروح تجمع ورقك عشان متشترهوش تاني في التخلفات .. ( فكر اقتصادي بحت ) 


المهم فتحت اول باكت وفضيت الي فيه .. اشم يا عم الحاج .. مفيش اي ابن كلب  .. ادوق .. بردو مفيش لحد مكلت نص الباكت تقريبا رغم انه طعمه يقرف الكلب ..

المهم كده صورتي وانا قاعد بمتحن تخلفات اكتملت قدامي بنسبه كبيره .. بس قولت نعمل محاوله اخيره .. 

هوبا روحت هارش في دماغي .. ابص حواليا .. فين عم عاطف .. مفيش عم عاطف .. قعدت اهرش ربع ساعه لما قربت اتقرع .. لحد مظهر عم عاطف  .. ايه يا عم انت كنت فين الله يخربيتك .. شوفلي كده البودر ده ايه ... 

دب صباعه في البودر لما خلص الشويه الي باقيين .. وبعدين بصلي كده ورفع حاجب ونزل حاجب .. لحد مبقي شبه ميمي شكيب كده .. وقالي .. والله معارف يا دوكتور .. بس هو يا سينا .. يا هيوسايمس ... 

بصيتله كده بكل اسي وانا الدمعه هتنزل من عيني ... 

- ابوس رجل امك ... اتاكد .. انا مستقبلي بيضيع يا عم عاطف وامي جالها السكر ... وابويا معدش راضي يصرف عليا .. 

قالي بص  .. عشان انت حبيبي بس .. اكتبه هيوسايمس وعلي ضمانتي  ... 

- ايوة كده .. هو ده الشغل يا كبيرنا .. شوفلي بقي الي في الباكت التاني ده ايه .. 

لسه جاي بافتحه لقيت رئيس القسم ذات نفسه بينادي علي عاطف ودماغه بتطلع دخان ... 

- انت يا جعر ... انت بتعمل ايه عندك .. تعالي هنا متعطلش الطلبه .. 

كنت عايز ااقله انت مال اهلك انت بس قولت يلا مش مشكله .. انا الكبير .. وروحت خابط اي اسمين من غير مافتح الباكت اصلا  وسلمت الورقه .. وقولت عشانا عليك يا رب

وانا خارج عم عاطف جري عليا كده .. 

-الحلاوة يا دوكتور ... 

بصيتله كده بصه احتقار واشمئزاز .. وقولتله .. اخفي من وشي الساعه دي .. حلاوتك في التخلفات ان شاء الله ... 


الأحد، ١٢ ديسمبر ٢٠١٠

بيان رقم 14 ... بحبها يا لمبي (2) ... (:


- بص يا برنجي .. البت دي بقت بتاعتك .. ملكش دعوة .. بكره هنزل انا وانت الجامعه ومش همشيك منها غير وانتو مخلفين عيل .. وكمان هخليك تسميه علاء الدين علي اسم ابوك .. 

>> تاني يوم نزلت الكليه علي الساعه 10 ونص كده .. جبت كبايه القهوه وانا داخل الكليه ولسه جاي بحط الكبايه علي بقي عشان افوق .. 

- ايه يا بوووووووب .. انت فين من الصبح مش قولتلي هننزل النهارده الساعه 7 ! 

- 7 ايه يابن العبيطه اذا كان الكليه بتفتح 9 .. وبعدين انت مالك مبهدل كده الله يحرقك .. هو انت رايح تظبط زحلفه ! 

- اعمل ايه بس مانا منمتش من امبارح .. وجيت اغسل وشي الصبح المايه كانت قاطعه .. ولسه جا .. 

- خلاص يا عم انت مصدقت .. انا مالي ان شالله تولع ! وبعدين انت من امتي بتغسل وشك يعني .. الخلاصه شوفت الحته الي هنظبطها النهارده ؟! 

- اه يا بوب .. دخلت الكليه علي10 كده وجابت ساندوتش برجر وواحد بطاطس كاتشب ومايونيز .. وكانز دايت  .. بيبسي او كولا مقدرتش اشوف كويس .. وبعدي .. 

- عوض عليا عوض الصابرين يا رب .. بص ااقفل بقك المنتن ده ومتفتحوش تاني غير لما ااقولك .. وارمي السجاره الي في ايدك دي بدل مانت عامل زي محمود المليجي كده .. انا كان مالي ومال الحوار المنيل علي دماغ اهلك ده .. 

- ادي العلبه كلها يا عم .. المهم انجز بقي قولي هنعمل ايه عشان نظبطها .. 

- بص يا سيدي .. احنا هنخلي الواد ميدو الرخم يروح يعاكسها .. هارش ؟ 

- هارش ... 

- وبعدين انت هتروح وتفرد صدرك .. وتقوله ايه يا ابو الكباتن .. مش عيب تعاكس بنات كليتنا واحنا واقفين زي الطراطير !

- وبعدين ؟! 

- هيشد هو معاك وبعدين هتضربه علقه محترمه .. بس بالراحه عالولا انا عارف غباء اهلك ده .. خرشمه بس بالراحه .. وبعدين انا هدخل وااقولك ايه ده انت قوي اوي يا كابتن .. انت كده ازاي ! 

- البت هتقع في لظاليظك يا معلم لما تلقيك بتدافع عنها .. وهوبا تاخد موبايلها وعيش اللحظه يا معلم ! 

- عليا الطلاق انت عبقري ! يابني انت خساره في البلد دي ! هم دول الصحاب ولا بلاش .. الله عليك يا مظبطنيييي

.. اتفقنا مع الواد ميدو الرخم وبدانا في تنفيذ خطتي الجهنميه ... 

-ميدو داخل زي الاسد المنغولي في وسط قطيع من الجاموس الوحشي .. 

- يا ابله .. يا ابله .. القلم ده وقع منك .. 

- لا حضرتك القلم ده مش بتاعي ... 

- ولا بتاعي يا باشا .. بس ميغلاش عليكي طبعا ! 

يلا يا ريس .. ادخل زي مقولتلك وبعد متشد معاه في الكلام اديله بالقلم وبعدين عضه من ودانه مع كام بنيه زي ماتفقنا .. 

لسه عم الحاج بيتحرك عشان يروح يضرب الضحيه .. لقيت سوسو ميته علي نفسها من الضحك .. والواد ميدو منشكح كده .. الفار لعب في عبي وناديت علي صاحبي عشان يكسكس لكن من دون جدوي .. الواد كان سارح في ملكوت ربنا وبيتخيل نفسه هو وسوسو في جزيره سوماطره وهم بيقضوا شهر العسل .. 

- ايه يا ابو الكباتن .. انت بتضايق الدكتورة ليه ! 

- لا ابدا هو مبيدايقنيش ولا حاجه ! وبعدين انت مالك اصلا !!! 

- خير يا استاذ في حاجه ؟ ولا انت جاي تقول شكل للبيع ؟

وحدث ما لم يكن متوقع .. البليه لعبت مع الواد ميدو النتن وقرر انه يبعنا ويرشق مع سوسو  .. بس صاحبي ابو دماغ كبيره موصلتلوش الفكره وفاكر ان ميدو لسه تبعنا  .. :( 

- استاذ ايه شايفني ماشي بخرزانه في اييدي وطباشير في جيبي ! 

- اتكل علي الله يابني متخلنيش اتنرفز علي اهلك ! 

- تتنرفز علي مين يابن ال ****** وهوبا ميدو رفع ايده في الهوا .. وطارررررررررررررراخ علي وش الواد الغلبان ...

جريت بسرعه عشان احاول انقذ الواد واول لما وصلت ميدو حس بالخطر وقلع الحزام بتاع البنطلون .. انا لمحت ميدو من هنا وقولت بس انا هتنفخ النهارده  .. روحت رايح علي صاحبي .. وطراخ بالقلم علي وشه .. 

- في ايه يلا انت مزعل عمك ميدو ليه ! انت مالك ومال الانسه ! عيال قليله الادب بصحيح .. معلش يا عم ميدو سيبه المره دي وانا اوعدك مش هيعملها تاني .. 

بس خدت الولا من هنا وجبتله كبايه شاي من الكافتيريا ب 50 قرش وقولته .. 

- مش قولتلك يابني افكس للحريم .. دول مبيجيش من وراهم مصلحههههههههه .. 

:)

السبت، ١١ ديسمبر ٢٠١٠

بيان رقم 13 ... بحبها يا لمبي (1) ... (:


* جميع الشخصيات في هذه القصة هي من وحي خيال المؤلف وليس لها أي علاقة بالواقع .. وأي تشابه في الأسماء أو الشخصيات أو الأحداث .. اخبط راسك في اتخن حيط  .. (:

-الو

- ايه يا معلم ايه الاخبار .. 

- الحمد لله كله تمام انت عامل ايه ؟

- الحمد لله .. بس مكتئب والله يا ريس .. 

- عادي يا عم كلنا كده والله .. هي فتره الامتحنات بنت **** بس كله هيبقي تمام بعد كده .. 

- امتحنات ايه يابو دماغ ... انا مكتئب عشان حوار تاني ... 

- ممممم قول كده .. اكيد عشان خناقه ابوك وامك .. بيني وبينك الاتنين عايزين الحرق .. عيله هم مبيجيش من وراهم مصلحه .. بس عادي كل الابهات كده عندهم ربع ضارب ... 

- ابويا ايه بس يا عم انا لو هكتئب كل مره بيتخانتقوا كان زماني ولعت فيهم وفي نفسي من زمان  ...

- يبقي اكيد اتخانقت مع الواد اخوك السئيل ده تاني .. الصراحه انا مش عارف انت مستحمله ازاي  .. عيل اومليت بسمنه بلدي .. 

-اخويا ايه بس الله يخربيتك انت شارب ايه ! انا معنديش اخوات ولاد اصلا ! 

-طب اخلص بقي عشان انت خنقت امي .. ايه الي حصل ! 

- البت .. 

- بت مين ؟ 

- الي بحبها .. 

- ما شاء الله اخيرا لقيت حد يبص في خلقتك العكره دي ! طيب يا عم زعلان ليه احمد ربنا وبوس ايدك وش وضهر حتي لو اديتك بالجزمه فوق نفوخك .. 

- يا عم جزمه ايه بس .. هو انا عارف اكلمها اصلا

- انا قولت كده بردو .. مستحيل واحده عاقله تفكر ترتبط بيك .. ومين بقي تعيسه الحظ دي  ؟ 

- سوسو .. هي معانا في الكليه بس في سنه تالته .. الي بتركب عربيه لادا والشكمان بتاعها مخروم .. وبتعمل شعرها زي ادجر ديفدز دي  .. 

- ايوة ايوة عرفتها .. بس دي مستحيل تعبرك يابني دي شايفه نفسها . وفاكره انها صفيه زغلول  .. 

فجاه ابتدي الواد يصعب عليا .. وحسيت اني قرصت قوي عليه قولت نديله شويه حنيه عشان ميقفش مني .. وعلي راي المثل كله بالحنيه بيفك  .. (: 

- يابني سيبك من الحريم دول مبيجيش من وراهم حاجه عدله ... مانت شايف عبده صاحبنا من يوم مخطب وهو عامل زي الكنجرو الاسترالي محدش عارف يوصله  .. البت شكلها خدت الشبكه وقتلته ودفنته في بيتها .. انت اخر مره شوفته امتي  ؟

- في امتحنات سنه تانيه \ تالت مره .. قالي هيطلع يمتحن الشفوي ومن ساعتها مظهرش .. 

- الله يرحمه بقي ان كان مات ويجحمه لو كان لسه عايش ومبيسالش ..

-طيب انا مش عارف اعمل ايه دلوقتي .. اروح اكلمها .. ولا اخبط نفسي بالسكينه دي واستريح .. 

صحبي نفوخه مسوس واهبل ويعملها انا عارف قولت احاول انقذ الموقف باي طريقه قبل ميتهور .. 

- بص يا برنجي .. البت دي بقت بتاعتك .. ملكش دعوة .. بكره هنزل انا وانت الجامعه ومش همشيك منها غير وانتو مخلفين عيل .. وكمان هخليك تسميه علاء الدين علي اسم ابوك .. 

                                                                                                                           يتبع ,,

الجمعة، ١٠ ديسمبر ٢٠١٠

بيان رقم 12 ... امو عبير .. (:



- ازيك يا حبيبي ...

-الحمد لله يا طنط كويس ... انتي اخبارك ايه ..

-انا الحمد لله كويسه .. العيال مطلعين عيني يابني والله ..

- طب الحمد لله يا طنط

- والله يابني من يومك عمك صبحي ممات وانا الدنيا سوده في وشي .. الله يرحمه بقي مطرح مهو راح

- الله يرحمه .. ( انتي ايه الي فكرك بالسيره المنيله علي عين اهلك دي دلوقتي ) ..

- والله يابني كان مستتني .. مكنش مخليني عايزه حاجه .. كان مالي عليا البيت .. كان بي ...

- انتي عايزه ايه بالظبط يا حجه عشان انا عايز انزل ومش فاضي لفيلم الخطايا الي انتي عايشه في ده

- اه صحيح هو انا كنت جايه ليه .. فكرتني .. هي امك  هنا ولا فين ؟

- اه موجوده بس نايمه ..

- طيب كويس ادخل صحيهالي

- بقولك نايمه وجايه من السفر تعبانه ..

- ايوه يابني منا عارفه .. انا متفقه معاها وهي قالتلي عدي عليا بعد العشا ..

- ايوة يا حاجه بس المغرب لسه مادنش اصلا ..

- يابني متتعبش قلبي معاك وادخل صحيهالي ..

- الصبر من عندك يا رب .. حاضر هدخل اصحيها دلوقتي ..

- ماما ..

- هاااااا

ماماااااااااااااااااااااااااااااا

- مممممممممممم

-مامااااااااااااااااااااااا

- عاااااااااااااااااايز ايه يابن الموكوسه ؟ هو انا مش هعرف انام في البيت المنيل ده ساعتين علي بعض ! الفلوس عندك تحت المخده خدلك اتنين جنيه

- يا ستي انا مش عايز منكوا حاجه الله الغني ... الولويه الرخمه الي ساكنه تحتينا عايزاكي ...

- ودي عايزه ايه هي كمان الله يحرقها .. عماره هم مبيجيش من وراها غير وجع الدماغ ... انت عملت ايه تاني يا منيل اوعي تكون عاكست بنتها ولا عملت حاجه ..

- اعاكس ايه بس يا ماما دي شبه المصفه بتاعت المكرونه ... هي بتقول انها عايزاكي وانكو متفقين مع بعض ...

- متفقين ايه يابن العبيطه انت مش جايبني من المطار الفجر ! هتفق معاها امتي يعني في الحلم يعني .. عوض عليا عوض الصابرين يا رب

- اطلع اضربها بالمقشه يعني ولا اعملكوا ايه في ليلتكو السوده دي ..

- خلاص غور من وشي بخلقتك العكره دي هقوم اشوف عايزه ايه هي كمان ..

- ازيك يامو عبير .. والله وحشاني ...

الحمد لله يا حبيبتي .. انتي عامله ايه واخبار ابو كريم ابه ؟ 

الحمد لله ياختي نحمدو ونشكر فضله .. قطع الرجاله وقطعت سيرتهم ...

المهم اني قومت بسرعه قبل مصورة ابويا تتهز في نظري وخلعت من القاعده المنيله دي 

- ماما انا هنزل اصور ورق بقي عشان عندي امتحان كمان يومين ..

- قال يعني قوي من فلاحتك .. تقولش هتنجح قوي ياخويا .. غور بس متتاخرش ووانت راجع بليل هات معاك باتنين جنيه عيش ..

- حاضر يا ماما عايزه حاجه تاني ..

- لا اخفي من وشي 

المهم اني نزلت بسرعه قبل مامي تطلب حاجه تاني مني ..

ركبت الميكروباص في مكاني المعتاد وببص فجاه لقيت اتنين ستات تخااااااااااااااااااان جدا بيهجمو عالميكروباص .. ومن سوء حظ امي ( شكلها دعت عليا ) قعدو جنبي  ..

- طب متقعدوا ورا يا حجه الميكروباص واسع ..

- جرا ايه يا استاذ .. انت اشتريته بفلوسك ولا ايه .. اترزعي هنا يا وليه اما نشوف اخرتها ايه في يومكم الاسود ده ... 

- المهم قعدوا هم الجوز وخدوا تلات تربع الكرسي الي انا قاعد عليه وانا قاعد ولازق في الركن ووشي ملزوق في الازاز 

كان معاهم عيل صغير كده علي وشه تلامه الدنيا والاخره ببصله كده وببراءه بهزر معاه .. 

كوتي كوتي كوتي ... وبلعبله في وداني عشان الواد يضحك .. ببص لقيت بصلي باشمئزاز كده .. وعينك متشوف الا النور غرق وشي تفافه الله يحرقه هو وامه وابو الي رضي يتجوزها ... لسه جاي همد ايدي عليه عشان انتقم لقيته زعق لامه وقالها الواد ده ضربني ... وقرصني في ايدي .. وااااااااااااااااااااااااااااااااااااااااااااااااااء  بببببببببببببببببف زييييييييييوووووووووووو

انا طبعا وشي جاب الوان وكشيت في نفسي كده وبصيت للست في منتهي الزوق والاحترام .. حضرتك انا مكلمتوش والله .. هو الي تف في وشي وانا مرضتش اكلمه .. ينفع كده حضرتك  ؟ 

- طبعا انا توقعت ان امه هتقعد عليا تفطسني ولا هتشردني في الميكروباص كله . قريت الشهادتين وغمضت عنيا وقولت عشانا عليك يا رب .. 

هوبا الست رفعت اديها في الهوا قولت بس انا هطرش فيها وش .. الا ان المفاجئه ان القلم نزل علي وش ابنها .. طرااااااااااااااااااخ 

يابني ارحمني بقي هو انا خدامه ابوك .. الله يحرقك جبتلي الهم انت وابوك الاقرع .. ربنا يهدكو انتو الاتنين في يوم واحد توب عليا يا رب .. 

بصيت للواد الصغير كده وانا كلي انشكاح .. قولتله شفت يابن العبيطه .. عشان متتزكاش تاني يابن الاقرع .. 

(:

الأربعاء، ٨ ديسمبر ٢٠١٠

بيان رقم 11 .. بطييييييييييييييييييييييييييييخ (:



ما لا شك فيه اليوم وفي عصر العولمة التي نعيشها وضخامة البيانات والمعلومات المتوفرة بين أيدينا حيث يتطلب منا العمل الجاد لاستغلال تلك المعلومات في عملية تنظيمية وتحليلية لها للوصول لقرارات أو التنبؤ على الأقل في وضع إستراتيجية للعمل خلال سنوات قادمة ، وطبعا احنا هنا في مصر عارفين قيمه التعليم عشان كده جامعه القاهره رقم 1765 علي مستوي العالم ...

والسبب في نظام التعليم الفاجر ده هو الدكاتره ... احنا ما شاء الله اللهم لا حسد عندنا نخبه من الدكاتره ولا استاف جامعه كامبردج

طبعا انا مليش اي احتكاك بالدكاتره بتوعنا غير في امتحان الشفوي .. او بالاصح الامتحان الوحيد الي بيتعلم عليك فيه .. تدخل انت و 3 صحابك زي الورد للدكتور .. تطلعه من عنده عاهات غير صالحين للاستخدام الادمي ..

متفهمش هيستفيد ايه يعني لما يهزقك .. يعني انا فاكر مره حصل معايا موقف لذيذ قوي مع دكتور ظريف بغباء ..

دخلت لدكتور من الدكاترة معروف انه عصبى أوى أوى
و بيتخانق مع دبان وشه

المهم أول ما دخلت مكتبه
ما بصش عليا أصلا

و قام منادى بأعلى صوته
يا نفييييييييييييييييييييييييييييييسه
(دى الي العامله الي في المكتب بتاعه )
جات نفيسه و قالتله أيوه يا باشا!!
الدكتور (و بطريقة مرعبة): القهوة اللى انت عاملاها زى الزفت ايه القرف ده؟!

نفيسه :معلش يا باشا حقك عليا أعملك غيرها
الدكتور: ايه اليوم الأسود ده
حاجة تقرف
(على فكرة كل ده أصلا و أنا قاعد ما اتكلمتش ولا كلمه و عايز الأرض تنشق و تبلعنى)

الدكتور: و انت كمان هتخنقنى زى اللى قبلك و لا هتخلص و تنجز؟
أنا: ان شاء الله هجاوب يا دكتر
الدكتور: ؟؟hdkgvk;jsdgljg;sjkhjhvjkl/sdfh/lsjhl
(ده المفروض انه سؤال فارما لكن أنا مفهتش حاجة منه أصلا بالرغم انى كنت مذاكر كويس أوى)

لحظات من الصمت الرهيب سادت أجواء لجنة الشفوى
لا نسمع فيها سوى صوت عقارب الثوانى فى ساعة الحائط اللى فوق نفوخ الدكتور

و دخلت نفيسه بالقهوة :اتفضل يا باشا روق دمك مفيش حاجة تستاهل
الدكتور: انتى شايفانى مجنون و بأشد فى شعرى وللا ايه؟
(بصراحة كنت عايز أقوله أيوه فعلا بس ما رضتش اتكلم)

المهم توجه بنظره اليا
و قاللى هسألك سؤال تانى علشان ما نفضلش فى المكتب المؤرف ده لحد الصبح

الدكتور: gdghlfglhsdfgvhk;gvsfh;sjsbh lhsfghkl ??
بصراحة السؤال كان صعب و مش مفهوم أصلا

بس قلت لازم أرد و أقول أى حاجة
ابتديت اتكلم و اكسب وقت
ماهو برضه لازم أقول أى حاجة علشان ما آخدش الصفر الكبير
و لسه بابتدى اتكلم و اعمل تقسيمه
لقيته قام من مكتبه كالمارد الجبار
و بأعلى صوته صاح قائلا:
هو أنا بتاع بطييييييييخ؟ شايفنى بتاع بطييييييييخ؟ ماشى بعربية كاروووو و بأقول عا السكينة؟
اطلع برررررررره
بررررررررررررررررره!!!!

:D

في بردو دكاتره من النوع الي شايف نفسه .. زي مره دكتور external سالني سؤال معرفتوش ... قالي مهو اكيد انت متعرفش .. ولا الي بيدرسلك يعرفه .. ولا اينشتين نفسه يعرف ... انا بس الي عارف الاجابه ... ( اسم النبي حارصك وصاينك )

بردو مره دكتور قعد يسال فيا وانا مش عارف اجاوب .. يسأل وانا مش عارف اجاوب .. راح قالي هسألك اخر سؤال لو جوبت هديك الفول مارك .. ايه الفرق بينك وبين الحمار .. .. كنت عايز ارد عليه واقوله التربيزه الي قدامك دي يا دكتور بس قولت معلش انا الكبير ...
واحد صحبي بردو بس في كليه هندسه حكالي موقف ظريف جدا .. الدكتور بيساله ..

انبوب طويل وقائم مليان زيت لزوجته عالية
وبعدين كان المفروض إن احنا بنرمي كرات معدنية أقطارها مختلفة في الزيت ده ونحسب سرعتها عشان نجيب لزوجة الزيت بعد كده بحسبة بسيطة
المهم الدكتور جابله التجربة دي وقاله ايه الفرق لما نحط بدل الزيت ده ملوخية؟؟؟ (على فكرة الدكتور كان بيتكلم جد والله)
الولد السؤال استفزه راح قايل للدكتور نرمي بدل الكرات دي أرانب
أكيد خمنتوا اللي حصل بعد كده

الأحد، ٥ ديسمبر ٢٠١٠

بيان رقم 9 .. سوق العصر .. the social Network .. (:

ا
لانترنت هو وسيله الاتصال بين البشر والي عن طريقها بتتدفق المعلومات والثقافه علي مدار الساعه لينهل منها الجميع .. 

طبعا الكلام ده كله خرف .. وكلنا بنقعد عالنت  وعارفين الدنيا ماشيه ازاي .. 

النت عند الشعب المصري منقسم ل4 شرايح

1- جزء مش هينفع نتكلم عنه دلوقتي ... (فاهمني انت طبعا ;)  ) ودول بيمثلو 95 % من رواد الشبكه العنكبوتيه .. ( حاجه زي الحزب الوطني كده )

2- دول بقي ناس عندهم فراغ عاطفي .. وبيدخل علي النت عشان يحاول يشقط واحده ( وده طبعا بعد محاولات فاشله في الاحتكاك المباشر ) وغالبا ربنا بيوفقه في حته من المغرب او تونس او الفلبين ... نسبه قليله منهم بيسافر للحته الي شقطها وبيتجوزا ويعيشو في تبات ونبات ودول غالبا بتبقي الحته عمرها الافتراضي خلص وبتلعب في 70 - 80 سنه كده .. دول نسبتهم حوالي 40 % متداخلين مع الشريحه الاولي .. 

3- دول بقي الشباب الي فاكرين نفسهم احمد عرابي ورفاع الطهطاوي .. وتقدر تعرفهم من صورة بروفايل الفيس بوك ( راجل ااقرع وعنده شنب ومعمول عليه علامتين صح ) او اي شعار تاني مناهض للحزب الحاكم  .. زي لا للتوريث ومصر كبيره عليك والخرف ده كله .. وعلي طول مشير لينكات لناس الحكومه قفشتهم او ناس الحكومه اتقتلهم .. او ناس الحكومه **** .. النسبه هنا 13 % بنسبه تداخل بردو مع الشريحتين الي فوق لكن بدرجه ااقل شويه  ... 

4- ناس محترمه وكباره .. المهم عنده الكتب الدينيه والمحضرات للشيوخ المختلفه ... بيتميز بالهدوء النسبي واغلب الشير بتاعه للشيخ محمد حسان ومحمد حسنين يعقوب .. دول نسبه 2 % مع تداخل بسيط مع الشريحه التالته فقط ( وش يعني الراجل محترم ملوش في الهتش ده )

هنا بقي عايز اتكلم عن اختراع عظيم جدا .. الا وهو ال facebook 

عشان افهمكم الليله فيه ماشيه ازاي هدخل دلوقتي علي بروافايل اي حد من الناس الي عندي ونشوف هو كاتب ايه  .. 

------------------------------------------------------

السبت، ٤ ديسمبر ٢٠١٠

بيان رقم 8 ... انا راجل قوي مش قله .. (:

النهارده وانا راجع من الكليه وكنت مروح بدري لاني كنت مطبق ومش شايف قدامي .. مصدقت ركبت بسرعه وخدت مكاني الاستراتيجي في الكرسي الي قبل الاخير جنب الشباك .. المهم اني قعدت وركنت دماغي علي الازاز كده ولسه هسرح في ملكوت ربنا ..

لقيت صوت طالع من تحت رجلي وجاي من قدام ومن ورا ومن كل حته .. من هول الصدمه مقدرتش احدد ايه ده بالظبط وبعدين اكتشفت ان السواق الله يحرقه مشغل الكاست ومعليه علي الاخر عشان الجميع يستمتع بالمعزوفه الرائعه الي هو مشغلها ..

المهم والي شدني في الموضوع الكلام بتاع الاغنيه ... حاجه كده لا تقولي المتنبي ولا احمد شوقي ولا الكلام الفاضي ده ..  وانا ايه انااه انا انا انا ايه انا راجل قوى مش قله لبست العو فلنه انا راجل قوى مش قله وكلامى كله ادله 
 
:|

حاجه اخر حلاوة الصراحه .. الراجل عمل انجاز محدش قدر يوصله غير الشعب المصري الي دماغه بتخر عبقريه .. لبس العو فانله .. الله عليك .. اسم النبي حارصك وصاينك 


 وطبعا كل الي قاعدين في الميكروباص مستمتعين بقصه الكفاح دي ومحدش يقدر يعترض والا السواق ممكن ياخد فيه 3 سنين سجن .. المهم كان في راجل عجوز كده قاعد جنبي مشمئز قالي والنبي يابني قول للسواق يوطي شويه انا راجل كبير ومش حمل الخبط والرزع ده ...

انا عملت نفسي من بنها ولا كان عم الحاج بيتكلم .. بعدين لقيته خبط علي كتفي كده وزعق في وداني وقالي قول للسواق يوطي يابني ..

انا قولت في سري الله يخربيتك يعني انت عايش بتاخد علي دماغك بقاله 90 سنه من ايام الانجليز والخديو توفيق وجمال مبارك وجي دلوقتي تعترض علي صوت الكاست العالي :(

المهم شكلي كان وحش قوي وكان لازم اقول للسواق يوطي عشان عم الحاج ينزل من علي وداني ...
ناديت علي السواق بصوت واطي كله ادب واحترام .. ممكن لو سمحت بعد اذنك يا اسطي توطي الصوت شويه صغيره .. ده بعد اذن حضرتك طبعا ..

راح السواق موطي الكاست .. انا قولت والله انك راجل محترم ... وراح راكن العربيه علي جنب وبص لورا كده وقال مين الي *** الي بيتكلم ده ! انا كنت عايز انزل تحت الكرسي استخبي ولا انط من الميكروباص بس لقيت ال 13 راكب بيبصولي .. قولت بس يبقي مفيش مفر من المواجه بصيت للسواق كده نظره كلها اسي وقولته والله مانا ياسطي .. ده عم الحاج الي جنبي ده هو الي مش عاجبه .. ده انا لسه كنت عايز ااقولك تعلي شويه عشان صوت البيز مش ظاهر راح السواق بصوت عالي .. والنبي يا جدعان مش عايزين كل واحد ابن **** يستظرف نفسه .. والي مش عاجبه يشتري لنفسه عربيه 128 ويعلي ويوطي زي مهو عايز .. انما طول مانت راكب المكروباظ بتاعي .. محدش ابن  **** يفتح بقه .. فاااااااااااااااااااهمين ...

كل ده وانا حاطط وشي في الارض وعما اهز بدماغي اني موافق علي كل كلمه قالها السواق ولاكانه احمد فتحي سرور في مجلس الشعب .. ببص تحتي كده لقيت الارض بقي كلها ميه .. وعم الحاج باصص في الارض كده .. اتاري العمليه فرطط منه والدنيا بقت بظرميط خالص ..

قفلت مناخيري وفضلت قاعد ساكت لحد موصلت الموقف نزلت بسرعه قبل مالسواق ياخد باله وجريت علي بيتنا وانا بقول

الف حمد وشكر ليك يا رب .."  سبحان الذي سخر لنا هذا وما كنا له مقرنين وانا الى ربنا لمنقلبون "

الجمعة، ٣ ديسمبر ٢٠١٠

بيان رقم 7 ... العلم في الراس .. (:


كالعاده كنت نايم النهارده وما احلا النوم في الشتا ... احساس الدفا تحت البطانيه في يوم شديد البروده يوازي احساس ازازيه الميا الاكوافينا في ايد طفل صومالي  ... حاجه كده متتوصفش ... وعلي الرغم ان بلدنا الظريفه دي مبقاش فيها شتا .. وشهر 12 دخل اهو والجو لسه نار ولا كاننا عايشين في جيبوتي .. 

المهم يعني اني فوقت اخيرا وابتديت استوعب الوضع الي حواليا .. 

البني ادم اول لما بيصحي من النوم مبيبقاش شايل هم حاجه والدنيا بتبقي فوشيا في وشه لمده 12 ثانيه ... بعد ال12 ثانيه دول بيبدا يستوعب الواقع المرير الي هو عايش فيه ... امي عايزه مني انزل اشتري حجات من تحت .. يااااااااااااه داانا عندي سكشن الساعه 9 وهيطلع عين امي لحد موصل ..  اوباااااااااا ده انا ناسي اني لازم اكمل الكتاب عشان هيتسلم النهارده .. يا نهار اسود ده انا مشترتش الكتاب اصلا لاني صرفت فلوسه من 3 شهور ... لا كتب ايه ليله اهلك طين .. ده النهارده امتحان العملي .. ده احنا هندخل من غير اسكي.... 

وهنا بقي بتحصل 90 % من حالات الوفاه عند الشباب ... 

تقرير الطب الشرعي 

 ساعه الوفاه 18.25 الموافق 12-3-2010
  
... الي يقولك ابني كان زي الفل وصحي من النوم جاله كرشه نفس وفيص ... ميعرفوش القصه الظريفه الي ورا الماساه دي ...

المهم الدروس المستفاده من القصه الطويله العريضه دي اني اكتشفت ان الامتحنات خلاص .. وانا مبكرهش حاجه في حياتي قد الامتحنات دي :( الواحد بيحس انه معتقل في ابوغريب مش في كليه صيدله 

فتره الامتحنات عندي بتنقسم ل 5 مراحل ... 

1- تفكس للعيال الفشله الي انت مصاحبهم وتبدا ترشق للعيال الشاطره الي عارفين الليله ماشيه ازاي .. ( هتقولي ايه النتانه دي هقولك انت مال امك مش فاهم يعني ! )
2 - مرحله تحديد الاهداف .. في المرحله دي هتبدا تحدد المصدر الي هتزاكر منه .. ورق كورسات محضرات مش هتزاكر خالص وهتدخل الماده دور تاني كده يعني .. 
3- مرحله التجميع .. جمع ورق علي قد متقدر ومتستخسرش فلوس في ورق ولو العمليه زنقت اضربلك مراجعه ب 200 جنيه  .. (بلاش شغل اليهود الي انت عايش فيه ده وبح بحها شويه) 
4- يومين راحه بعد المجهود الخرافي الي عملته في التلات مراحل الي فاتم
5- وش يعني هتبدا تزاكر الورق الي جمعته ... الورق مش هيزاكر نافسه يعني ياعم الظريف ..


لو مشيت علي الخطه دي ونفذتها بكل دقه في امل انك تطلع بمادتين وتدخلهم دور تاني وتبقي برنس ... اما بقي لو فكرت نفسك عزت العلالي وشغلت دماغك ... هتاخد بالجزمه القديمه علي دماغك دي وهتعيد السنه وانت ضميرك مستريح ... 

اهم حاجه في فترت الامتحنات دي ان دي الفتره الوحيده الي هتصعب علي اهلك فيها ... ( اكيد يعني مش هتصعب عليهم عشان مش عارف تغلب بوظه في البلاي ستاشن بقالك 6 شهور ) 

عشان كده يا معلم لازم تستغل الفرصه ... وتعمل كل الي نفسك فيه في الفتره دي .. عايز فلوس  .. خد .. مخنوق من اخوك الي راشق معاك في الاوضه .. ابوك ممكن يتبري منه ويبعته علي ملجا عشان انت تاخد راحتك ... عايز تلم صحابك وتحششوا في قلب الشقه وابوك قاعد في الصاله .. بردو مفيش مشاكل .. المهم كله تحت غطاء المزاكره ولازم تاخد حقك تالت ومتلت .. 

كده يا معلم انا رسيتك علي الاساسيات الي هتشمي عليها .. ودي مش هتختلف كتير من طب لهندسه لتجاره .. الا طبعا ثانويه عامه ودي اتكلمنا فيها قبل كده .. "راجع بيان رقم 5 " 

مش فاضل غير حاجه صغيره يا معلم .. امك تدعيلك ... وانت بردو مفيش مشاكل من انك تتهد شويه وتصليلك ركعتين بليل عشان ربنا يكرمك ... لان التوفيق ورضا ربنا عنك عامل اساسي جدا لنجاح اي عمل .. 

والله ولي التوفيق ....

الأربعاء، ١ ديسمبر ٢٠١٠

بيان رقم 6 ... الحب هو .. (:

http://vb.arabseyes.com/uploaded/270435_1221090732.gif
الحب .. هو ذاك الشعور الخفي الذي يتجول في كل مكان ويطوف الدنيا بحثا عن فرصته المنتظرة ليداعب الاحساس .. ويسحر الاعين .. ليتسلل بهدوء .. ويستقر في غفله من العقل ورغما عنك .. داخل تجاويف القلب ...

ومعانا اتصال تاني ونقول الو ... 

- ايوة 

- الوووو 

- ايوة انا سامعك كويس مين معايا 

-الووووو اوسااااااااااااااااامه 

-يادي النيله في الليله السوده دي .. يا ست انا سامعك انجزي الساعه 2 بليل 

-ايوة يا اوسامه ازيك عامل ايه 

- الحمد لله انا كويس .. اتشرف باسم حضرتك .. 

- انا بحب البرنام .. 

- اسم حضرتك ايه انجزي بظرافه اهلك دي 

- انا رشاااااا ( مع صوت ضحك مريب في الخلفيه )

- ممم واضح .. ماشي نمشيها رشا .. ايه المشكله الي انتي طلعتي عين امي عشان خاطرها بقي يا رشروشه ؟ 

- انا بحب واحد يا اوسامه .. 

- مهو اكيد واحد امال يعني حيوان سلمندر .. اخلصي .. 

- وهو بيحبني ومستعد يعمل اي حاجه عشان خاطري .. 

- طيب وهتسموا الواد ايه ان شاء الله .. 

- مش دي المشكله يا اوس اوس .. المشكله اني اكتشفت اني مش بحبه هو اني بحب صاحبه .. 

- نهار **** اسود :( طيب انا ايه المطلوب مني مش فاهم ؟ 

-المهم اني بعد مقررت انفصل عنه عشان ارتبط بصاحبه اكتشفت اني مبحبش صاحبه واني بحب الواد عبده السمكري الي علي اول الشارع .. هو اينعم صايع وبيضرب بانجو طول النهار تحت كبري القبه بس الواد قلبه ابيض وبيحبني .. وانا .. 

...  فجاه بنسمع صوت اجش بيتلفظ بالفاظ نابيه مع صوت شبشب بينزل علي دماغ شخص ما .. 

تيت .. تيت .. تيت .. 

 واضح ان ابو صحبتنا قط .. قصدي واضح ان الاتصال اتقطع .. ناخد فاصل مع اغنيه علي الحجار ليه يا زمان مسبتناش ابريا ... 

طبعا انا كنت ناوي اني ارمي الراديو من الشباك بعد الحوار المقزز ده الا اني بحب الاغنيه دي قوي عشان كده اجلت القرار ده شويه .. 

واحد شايف نافسه هيجي يقولي ايوة احنا ايه علاقتنا بالفيلم الهندي الي انت حاكيته ده .. 

ااقوله اطلع بالماوس فوق واضغط علي المربع الاحمر الي علي يمينك فوق ده عشان انا اتخنقت منك الصراحه من ساعه مبدات اكتب الخرف ده ... 

روح يا شيخ ربنا ينتقم منك علي طول منرفزني ومطلعني من المود.. 


المهم يعني الفكره الي انا عايز ااقولها هو الوضع الي الولاد والبنات وصلوا ليه دلوقتي .. 

هل هو ده الحب فعلا ؟ ولا ده غطا عشان الناس تتسلي وتعيش يومين  تحت اسم ان الجوز بيحبوا بعض وبعد كده كل واحد يروح لحاله 

يعني تلاقي البنت في الكليه بتحب واحد .. وبعدين تتخطب لواحد .. وبعدين تتجوز واحد تاني خالص غير الجيش الي قبل كده ... طيب انتي مين الي اداكي الحق انك تعملي كده ؟ وايه زنب الراجل الغلبان الي هيشيل الليله في الاخر وهو فاكر ان البت عفيفه شريفه من الكليه للبيت والبيت للكليه

هيجي الشاب اللطيف يقولي احنا مبنعملش حاجه غلط .. يا دوبك انا باخد البت ونطلع علي كوبري بنها ونضرب كوزين دره مع عصير منجا ب 3 جنيه ونص من عند فرغلي ومفيش مانع بردو من شويه تفعيص عشان احلل الخمسه جنيه ونص الي اتدفعم .. 
انا مش هرد عليك عشان انت عيل قليل الادب وتصدق انك قفلتني وانا مش مش مكمل ام البوست المنيل علي عينه ده  .. سلااااام  ...
 
Twitter Bird Gadget