الجمعة، ٢٥ فبراير ٢٠١١

بيان رقم 22 .. يا مسهل يا رب .. (:

  •  
  • يا جدعان انا كنت في الكليه النهارده .. كل المواد دخلت الكونترول وخلاص بكره بالكتير النتيجه هتظهر .. 
  • انت متاكد يابني ولا بتفسي زي كل سنه ؟ 
  • عيب عليك كلام اكيد .. النتيجه بكره ان شاء الله
  • ربنا يستر يا معلم  .. 
  • خير ان شاء الله .
طبعا بعد التصريح الفظيع الي ادلي بيه الواد العبيط ده من شويه انت قاعد علي اعصابك .. ومش مستحمل كلمه من حد ولا عارف تنام ولا تاكل وقاعد طول اليل الترم المنيل علي عين اهله بيمر قدامك .. كل سؤال سبته .. كل سؤال كنت عارفه بس مفتكرتوش .. كل سؤال كنت فاكره حاجه وكتبته حاجه تانيه خالص ...  كل التهزيق الي اتهزقته في امتحنات الشفوي ... ويبدا قرينك يتكلم معاك .. 

  • كان لازم يعني تعمل نفسك فزلوك وتهذي قدام الدكتور ! لما انت مش عارف الاجابه بتفتي ليه ! متقوله مش عارف 
  • خلاص والنبي متقرفش امي .. انا كنت اعرف منين يعني انه هيتنرفز كده لحد ميرمي كبايه الميه في وشي ! مانا بقالي 6 سنين بقتي في الشفوي محدش عملي كده قبل كده .. 
  • خلاص استحمل بقي يا معلم الي هيحصلك ! 
  • خلاص الله يحرقك قرفت امي  ... ادخل نام عشان انا اتخنقت منك 
  • انام ازاي بس ! مين هيجيله نوم النهارده .. كل مافتكر واحنا قاعدين في اللجنه .. وانا عمال ااقولك غش من البت الي جنبك وانت عاملي فيها محترم ...
  • اعمل ايه بس مانت شايف البت بتخبي مني اهزق نفسي اكتر من كده يعني ! 
  • لا يا عم خلينا قاعدين كده علي اعصابنا لحد مالنتيجه تظهر 
  • ملكش فيه والنبي وغور بقي عشان انا كرهت عيشتي بجد ! 
  • حاضر انا ماشي وسيبهالك خالص .. بس لما تقفل موبايك بكره وتقعد تعيط تحت البطانيه متبقاش تنادي عليا .. 
  • اه يابن التـــــــــــــــــــــيت 
  • اهو انت ! 
 الساعه بقت 4 الفجر وبردو مش عارف تنام .. الفجر يادن تقوم جري تتوضي وتصلي .. قال يعني قوي الايمان بيخر .. بعد كده الدعاء المعتاد .. 
يا رب .. يااااااااااارب انت عالم بحالي .. يا رب انجح بس دي اخر سنه .. انا لا عايز جيد ولا حتي مقبول .. انا عايز اشيل علي درجتين بس وانجح بالرافه .. يا رب اعدي السنه دي علي خير وانا هصلي كل الفروض في الجامع .. وهبطل اخنق علي امي .. ومعنتش هنزل مع العيال الفشله الي مصاحبهم وهبقي بني ادم كويس .. يا رب يا كريـــــــــــــــــــــــــــــــــــــــــــــم ... 

طبعا بعد النفحات الايمانيه العطره دي والاجواء الروحانيه الي بترف رف في الاوضه بتاعتك هتحاول تنام .. اينعم مش هيجيلك نوم .. بس ممكن تنام علي 10 الصبح كده

علي 4 العصر كده بتصحي  مخضوض علي صوت موبايل  .. 

  • الو .. 
  • ايه يا معلم انت لسه نايم 
  • اه هعمل ايه يعني ؟ النتيجه ظهرت ؟ انا شلت كام ماده ؟ قول يا عم عادي متخبيش عليا .. فيتو وفارما وابلايد صح ؟
  • يانهار ازرق هو انت ممكن تشيل فيتو وفارما وابلايد ؟
  • يا عم يا رب تيجي علي قد كده .. ايه هي لسه مظهرتش ؟
  • لا يا معلم لسه .. 
  • امال ايه الكلام مفيش اخبار هتظهر امتي ؟ 
  • لا والله بس شكلها لسه بكره  .. 
  • يا ###### .. لسه هستني بكره تاني ! انا جالي جفاف من القلق 
  • يا عم متخفش ربنا هيسترها ان شاء الله 
  • طويب لو عرفت حاجه اديني تيليفون قشطه ؟ 
  • عاش  .. 
تبدا ترتاح نفسيا شويه وتطمن ان لسه قدامك كام ساعه هتعيشها بكرامتك في البيت المنيل ده ..  تروح للاب وتشغل اي حاجه لعبد الباسط حموده .. وتفتح الفيس وتويتر عشان تشوف الدنيا فيها ايه .. ومفيش مانع بردو كل شويه تشيك علي جروب الكليه يمكن تلاقي حاجه كده ولا كده ... 
- يا جدعان النتيجه ظهرت دلوقتي انا جبت امتياز .. كله يقول مبروك ! 
 امتياز ايه ابن العبيطه ده هو في حد بيجيب الحجات دي في كليتنا ! 
- يا جدعان النتيجه ظهرت دلوقتي علي موقع الكليه .. انا جبت جيد جدا .. لولولولولولي .. 
- تبدا تشك في نفسك وتتطمن ان النتيجه كويسه والناس ناجحه ومظقططه والحياه زي المربي .. 
 بعد متمر بمرحله الانكار الي فاتت دي تبدا تحاول تفتح موقع الكليه عشان تشوف انت هببت ايه .. هتبدا تحاول تفتحه من 6 العصر كده .. وهيفتح معاك علي 1 بليل او 3 الفجر بالكتير .. وطبعا انت كل ده علي اعصابك وخلاص هيجيلك تبول لا ارادي من القلق ..
فجاه يفتح الموقع معاك بعد متكون نشفت .. تدخل الكود بتاعك وتستني ساعه كمان لحد ميفتح .. وانت عمال توهم نفسك بالجيد والمقبول والحاجت الفاجره دي .. لكن فجاه بينتهي الحلم الجميل ويبتدي الهم التقيل .. تقعد نص ساعه تقلب علي جيد مفيش .. مقبول .. ممكن تلاقي واحده او اتنين وكده يبقي ربنا كرم من واسعه وتقعد تبص للضعيف من كل الاتجهات علي امل انها تتحول بقدره قادر مقبول .. وتقعد تعمل ريفريش تلاتين مره لحد متقتنع انها ضعيف خلاص مفيش مفر ..
ساعتها بقي تبدا تعد علي صوابع اديك ورجليك انت شايل علي كام درجه .. وتشوف كام بيبر وكام عملي وايه منتهي وايه مكمل الترم التاني لحد ميجيلك ساكته قلبيه وتفوق وانت في المستشفي وعندك شلل نصفي وفقدت القدره علي النطق .. وهنا بقي هيطلعلك قرينك .. 
  • مش قولتلك زاكر من اول السنه ؟ 
  • اي ببب بوو بيي بااا 
  • بتقول ايه مش فاهم منك حاجه ؟ 
  • اي ببب للمااا ممنننن كلب 
  • مش فاهم منك حاجه بس شكلك بتشتم .. عموما هطلع اجدع منك ومش هسيبك .. انا راشق معاك ويانا يانت يا معلم (:   (:

الأربعاء، ٩ فبراير ٢٠١١

بيان رقم 20 .. الشعب يريد 4 .. (:


- مبلاش ولاد الحلال دول يا ريس احنا داخلين علي مرحله صعبه ومحتاجين تضافر كل الجهود ..

- مخلاص يا حبيب انت بتلك كتير كده ليه .. اتكل علي الله وخلصني من الحوار المهبب علي عينك ده ..

- حصل يا ريس .. 


 -------

يوم 25 يناير 2011 الصبح .. 




الريس واقف بيشم الهوا في البلكونه وبيسمع اغنيه عبد الباسط حموده سلفني ضحتك ... 


- الله عليك يابو حموده .. قطع في قلبي يابني .. ااااه منك يا شعب ناكر للجميل .. امال لوكنت رئيس اليونان ولا تركيا ولا اي حاجه من البلاد الهشتك بشتك دي .. مش كفايه مستحملهم 30 سنه .. وكمان مشعاجبهم .. يلا ربنا عالظالم والموفتري ... اما اتصل بالواد نظيف اشوف ايه الاخبار .. الواد ده من يوم ماتجوز هو مش شايف شغله كويس .. فين ايامك يا عاطف يابو عبيد .. اييييييييييييييه


- الو .. 
- خدام جنابك .. 
- ايه يا نظيف الجو القديم ده .. امال حكومه الكترونيه ايه وهباب ايه علي دماغك ؟ انت لسه في مطروح ياد ؟
- لا يا باشا انا في شرم دلوقتي .. عريس جديد بقي يا ريس وكده 
- عريس جديد ايه الله يجحمك .. انت مش متجوز بقالك 4 شهور روح يا شيخ الاهي  يقرمك  القرش الي عندك ميعرفولكش راس من رجل بعد كده يا بعيد 
- ربنا يخليك لينا يا ريس وميحرمناش من دعواتك الحلوة دي
- ماشي يا سيدي .. ايه حوار المظهرات الي في البلد دي يا ابو النظاظيف ؟ 
- مشعارف يا ريس .. انا كنت قاعد امبارح علي الفيس بوك والعيال كانو عاملين شويه لبش في صفحه كلنا ابراهيم سعيد .. وبيقولو هيخلعوك ويحطوك عالخزوق .. بس شكله كلام فشنك متشغلش بالك يا ريس .. 
- طبيعي ماشغلش بالي مانت هتهرب بالملايين وانا ال هتخزوق .. بس ايه علاقه ابراهيم سعيد هو الواد ده مش بتاع حريم وملوش في السياسه ! 
- مشعارف يا ريس والله .. عموما حبيب عارف شغله كويس .. الامن المركزي كله دلوقتي في الشارع وجبنا شحنه قنابل مسيله للدموع من اسرائيل و 2 طن رصاص مطاطي من امريكا .. كله هيبقي تمام متشغلش بالك انت يا كبير .. 
- ربنا يستر شكلك هتوديني في داهيه انت وهو ...



بعدها بكام ساعه .. الريس قاعد بيلعب بلاي ستاشن مع حسني الصغير وفجاه بيدخل عليه نظيف وهو وشه مقلوب وشعره منعكش


- خير يا وش الخير ايه الي جابك من شرم .. ومالك مبهدل كده ليه 
- انت قاعد بتلعب بلاي ستاشن يا ريس والدنيا مقلوبه بره ! 
- مقلوبه ! انا لسه متفرج علي التلفزيون المصري دلوقتي كانو جايبين فيلم مهمه في تل ابيب والحياه زي الفل والناس مبسوطه 
- الدنيا مقلوبه بره يا ريس وحبيب اتهبل وعمال يضرب الناس بالرصاص .. والشعب حلف بالطلاق ميهروح غير لما تخلع ! 
- اخلع ! مش بقولك شعب طيب وعبيط .. اهم حاجه الفلوس في سويسرا زي مقلتلك ؟ 
- حصل يا ريس 
- وفلوس السعوديه ؟ 
وصلت يا ريس 
- وفلوس جزر المالديف ؟ 
- كله تمام يا ريس .. 
كده انا مطمن .. خلي بقي شفيق يجهزلي طياره محندقه كده ويسخنها عشان في اي لحظه نخلع .. 
- الله علي العبقريه .. كلنا وراك يا ريس ! 
- كلنا مين يا حيلتها .. سلم العهده الي معاك عشان هطلع اخطب في الشعب كمان شويه يمكن ربنا يهديهم 
- كده يا ريس ده انا خدامك بقالي 10 سنين من ايام مكنت شغال في موبينيل
- متلكش كتير وشوف هتهبب ايه في ايامكو السوده دي .. اتداري لحد مالازمه دي تخلص وقبل متمشي قول لحبيب يضرب الي يفتح بقه بالجزمه .. مش ناقصين وجدع دماغ .. 
- حصل يا ريس :(


           بيان الريس في التلفزيون .... 


ايها الشعب .. اننا اليوم نواجه ازمه تعصف بهذا الوطن .. فقد قام المندسون والخونه والعملاء بشق صفوف هذا الشعب المجيد .. وقد اصدرت اوامري .. بعدم التعرض لاي مواطن .. وبتامين جميع التظاهرات .. فحريه الراي مكفوله للجميع في ظل المناخ الديمقراطي الذي نشهده هذه الايام .. بس لو حد فكر يرمي طوبه ولا يولع عود كبريت واحد انا هطلع عين امه! لحد ميقول حرمت يا ريس  .. فاهمين ؟؟؟ كما انني قرت اقاله الحكومه ... وتشكيل حكومه جديده لتدفع باستقرار هذا الوطن نحو مستقبل افضل وعصر جديد من الحريه والديمقراطيه .. وانني ادعوا جميع المواطنين الشرفاء .. الالزام بالهدوء وضبط النفس .. واحب ااقولكو اني قاعد علي قلبكوا .. ومش ماشي . واخد بالك ياقرع يابو شنب ؟؟ مش مااااااااشي واعلي ما في خيلك اركبوا ... والسلام عليكم ورحمه الله وبركاته .. محمد حسني مبارك ... 


                                                                                                                                                                  يتبع (:

الأحد، ٦ فبراير ٢٠١١

بيان رقم 19 .. الشعب يريد 3 .. (:

- طيب تمام يادوبك انزل الف لفتين في التراك واطلع انام شويه ..والله يابني صحتي في النازل .. منه لله شعب موفتري 
-الله يكون في عونك يا ريس ..  في رعايه الله يا كبير .. 



...........................

-يا فتاح يا عليم يا رزاق يا كريم .. اصطبحنا واصطبح الملك لله .. 

الريس بيقوم يغسل وشه ويظبط الادء وبعدين ينزل يجري  10 لفات في التراك وبعدين ماتش الاسكواش  بتاع كل يوم وطبعا احمد نظيف لازم يتغلب كل مره عشان لو فكر بس انه يكسب هيطيره هو والي خلفوة ..ويرجعه تاني يشتغل في موبينيل عند سويرس 

بعد كده الريس يفطر الفطار المعتاد بتاعه .. مع كبايه الشاي في جنينه القصر الجمهوري .. يلبس النضاره ويتحرك ببطء ويمسك الجرايد بتاعت النهارده .. يبدا بالاهرام ..

معدلات النمو الاقتصادي مستمره في الارتفاع .. والمهندس احمد عز يقر الميزانيه الجديده بموافقه 420 صوت من اصل 421 في مجلس الشعب .. 

ابتسامه صفرا علي وش الريس وبعدين يقول في سره .. 

- عفارم عليك يا واد يا عز .. انا قولت محدش هيعدي الميزانيه المخرومه دي غيره ..

بعدين يمسك الاخبار .. 

- مظاهرات حاشده في لبنان ... و نبيل جع جع يأكد .. لا تفاوض قبل نزع سلاح حزب الله .. 

- يادي النيله .. مش هنخلص بقي من ام فيلم لبنان ده .. مكملوش مليون نفر وعاملين قلق في العالم كله مشعارف علي ايه .. عليا الطلاق انا بطل اني قادر اسيطر علي 80 مليون بئف منتشرين زي الجراد ومحدش قادر يفتح بقه .. 

الجمهوريه

- وزير التضامن الاجتماعي ياكد لا مساس برغيف الخبز .. ووزير التعليم يحيل مدير مدرسه ام زينهم للتحقيق بعد قتله تلميذ بالخطا .. 

- لا حول ولا قوه الا بالله .. الواد فيص .. بس اكيد بردو هو استفزه .. الشباب اليومين دول عايز ضرب الجزم .. 

ولسه جاي بيحط الجرايد بعد مخلص قرايه لقي جرنان شكله مريب كده اتردد الاول انه يمسكه ليتكون اخرته زي اخره السادات بس الفضول الي كان جواه اتغلب عليه ومسك الجرنان بحرص وشاف العنوان بتاعه .. لقي اسم الجرنان الدستور ! 

- دستور ايه ده ياخونا ؟ هي البلد دي فيها جرايد غير اخبار اهرام جمهوريه .. وجرنان الوفد ومجله الشبكه ؟؟

بدا يبص ايه الي مكتوب في الجرنان وهنا بدات اديه ترتعش وعينه بظت منه من هول الصدمه ... 

- مظاهرات حاشده في القاهره والاسكندريه والسويس .. ودعوة ليكون يوم الجمعه هو يوم الغضب في كل انحاء مصر ...

- يحاول الريس يتمالك اعصابه ويقري الخبر تاني كويس .. اكيد هو قري غلط .. دي مش مصر الي اعرفها ! اكيد دي لبنان 

-يا علاااااااااااااااااء .. علاء يابني خد بايد ابوك .. كلم عمك حبيب بسرعه اما نشوف ايه الي بيحصل .. 

- ايوة يا ريس .. خدام جنابك .. 

- ايه يا حبيب الي قريته ده ؟ 
- اشاعات مغرضه يا باشا والله ! 

- مش تعرف الاول انا اتهببت قريت ايه علي عين اهلك ! 

- اه صحيح يا باشا هو انت قريت ايه ؟ 

- مش عارف يا حبيب بيقولو مظهرات ودبح وخلاص وحجات غريبه كده .. هم هيعملوا فيا ايه يا حبيب طمن قلبي يابني :(

- يا ريس اطمن كله تحت السيطره .. مهم بقالهم 30 سنه بيقولو نفس البوقين ومحدش بيعمل حاجه .. طول مانا في ضهرك نام وانت مطمن .. 

- ربنا يطمن قلبك يابني ويرزقك دنيا واخره ويوقفلك ولاد الحلال .. 

- مبلاش ولاد الحلال دول يا ريس احنا داخلين علي مرحله صعبه ومحتاجين تضافر كل الجهود ..
- مخلاص يا حبيب انت بتلك كتير كده ليه .. اتكل علي الله وخلصني من الحوار المهبب علي عينك ده ..

- حصل يا ريس .. 

                                                                                                                                  يتبع ..

الجمعة، ٤ فبراير ٢٠١١

بيان رقم 18 .. الشعب يريد 2 .. (:


- شوف شغلك انا مش كل يوم هقعد ااقولك تعمل ايه ومتعملش ايه .. انا داخل عالتسعين ومبقتش حمل مناهده .. 

- حصل يا ريس ... 




-الو .. 
-ايوة ... 
-الوووووووو .. سامعني .. 
-ايوة سامعك مين معايا ؟
- انا الوزير يابن الهايفه ... انت لسه في الساحل يا حسين ؟ 
-ايوة يا باشا رجالتك في الساحل بنطارد فلول جماعه الاخوان المحظورة .. 
- بطارد الفلول ولا بطارد الوز وز الي عندك .. انت مش متجوز يا حسين اتهد في بيتكو وشوف شغلك البلد خربت .. 
-خير يا باشا تعليمات سعادتك .. 
- لملي العيال بتاعت الفيس بوك يا حسين .. مش ناقصين وجع دماغ .. 
- بس يا باشا دول كتير هنلم مين ولا مين ؟ 
- اتصرف يا حسين ااقولك اطلق المساجين الي عندك والعيال الي بتضرب بناجو وحط في كل زنزانه 200 وااحد ولا حاجه .. صرف نفسك يعني امال انت بتاخد الكام مليون اول شهر عشان تقعد تعط في الساحل ؟ 
-حاضر يا باشا اعتبروا حصل .. 


-----------

اااااااااااااااااااااااااااااااااااااااااااااااااااااااااااااااااااااه 
- مش هتنطق بردو يلا مين الي مسلطك ؟ 
- يا باشا والله ماعرف حد .. ده انا عيل هايف وعبيط وبظيط في الظيطه .. والله يا باشا ماليا دعوة .. 
- شغل الكهربا يابني في ليله امكو السوده دي ... 
- ااااااااااااااااااااااااااااااااااااااااااااااااااااااااااااااااااااااه 
- هاااااااااا انجز يابني احنا قاطعين الكهربا عن المنطقه كلها وماتش الاهلي كمان شويه .. الناس هتعمل ثورة قول مين الي مسلطك وخلصني .. 

- يا باشا والله ماف .. 
- ااااااااااااااااااااااااااااااااااااااااااااااااااااااااااااااااااااااااااااااااااه 
- هااااااااااااااااااااااا 
- خلاص يا باشا انا هعترف .. والله هقول علي كل حاجه .. احنا عاملين تنظيم سري وناوين نفجر سيتي ستارز واركيديا مول .. وامريكا واسرائيل وايران وجاميكا هي الي واقفه ورانا .. واحنا الي مسئولين عن ازمه العيش في مصر بدعم من حماس .. واحنا الي غلينا الطماطم ورخصنا الكوسه .. واي حاجه تاني يا باشا انا رقبتي سداده .. 
- طب مكان من الاول ! لازم يعني تخلينا نستخدم العنف ؟! 
- معلش يا باشا هات راسك ابوسها .. 
- راس ايه الي هتبوسها يا حيوان .. شغلوا الكهرباااااااااااااااااااااااااااااا .. ...


- ها يا حبيب ايه الاخبار عندك .. 
- كله تمام يا ريس العيال اعترفت والوضع تحت السيطره .. 
- اوعي تكون العيال فيصت .. مهما كان دول اولادنا .. عذبهم بالراحه يا حبيب مش ناقصين مشاكل .. 
- متخافش يا ريس احنا شاغلين كهربا و خوزايق بس .. وكله تحت تعليمات سعادتك .. 
- طيب تمام يادوبك انزل الف لفتين في التراك واطلع انام شويه ..والله يابني صحتي في النازل .. منه لله شعب موفتري 
-الله يكون في عونك يا ريس ..  في رعايه الله يا كبير .. 

                                                                                                 يتبع .. (:

الخميس، ٣ فبراير ٢٠١١

بيان رقم 17 .. الشعب يريد 1 .. (:


- ريس .. 

- بففففففففففف 

- ريـــــــــس .. 

- بفففففففففففففففففففففففففففففففففف سووووووووووو

- وبعدين بقي في اليوم المطين ده .. يا حـــــــــــــــــــــــــــــــــوسني ... 

- لالا .. والنبي محد ياضرب .. انا هغير الحكومه ومش هخلي جما .... ايه ده ! انا فين ؟ 

- ايه يا ريس انت نايم والبلد بتولع .. 

- في ايه يا حبيب مالك  براحه يابني ده انا في سن جدك  ؟ بص تصدق يا ولا انت فيك شيء لله .. انا كنت في كابوس يا واد يا عدلي .. بس ايه لوز .. كنت خلاص هتحط عالخازوق :(

- خزوق ايه بس يا ريس .. طول مرجالتك في ضهرك محدش هيقدر يخزوقك  ...

- عاش .. انا بحبك يا واد يا عدلي اكتر من النسوان .. انت اكتر وزير ريحني في ال50 سنه الي انا مسكت فيها الحكم .. عفارم عليك ..

- المهم اصحي بقي كده وفوق عشان عايزك في حوار كده .. 

- خير يا وش الخير .. قطر ولع ؟!  

- لا يا ريس مبقاش في قطره عشان تولع اصلا 

- حد فجر نفسه ؟ انا عارف العيال بتوع حماس عايزين يخربوها 

- لا يا ريس هو حد يقدر يولع عود كبريت حتي .. انا مسيطر علي الوضع 

- ممممممممم يبقي اكيد حد ولع في نفسه .. حوار التوليع ده شغال في البلد بعد الي حصل ل بن .. بن .. بنننن والله مانا فكر اسمه كان ايه .. ما علينا  

- لا يا ريس مفيش بنزين في البلد اصلا عشان حد يولع في نفسه 

- امال في ايه وجعت قلب امي معاك .. مش كفايه جيمي عمال يزن علي دماغي طول النهار يا بابا عايز امسك البلد .. يا بابا عايز امسك البلد ..  لما خلاص كرهني في عيشتي .. مش عارف الواد ده طالع طماع كده لمين مش كفايه عليه الحزب ؟ المفروض يبقي قنوع زي ابوة كده ...ايه الي حصل قول خلصني

- الfacebook يا ريس 

-اه والله يابني انا الحته دي بتوجعني وحاسس فيها بالم اعوذ بالله .. بس انا اتفقت مع سوزان وهعمل العمليه وكله هيبقي تمام ! 

- عمليه ايه يا حج انا بقولك العيال الي علي ال facebook عاملين ثوره وعايزين يطيروك يا عم الفاجر 

-يادي النيله .. هو انا خلصت من التكفير والهجره لما هيطلعلي الfacebook  اعتقل العيال دي يا حبيب ومتصدعش دماغي انا عندي ماتش اسكواش كمان شويه ... 

- بس دول كتير قوي يا ريس والراجل الاقرع الي اسمه البرادعي عمال يسخن فيهم والموضوع شكله جد .. 

- جد ايه بس يابو دماغ فيها صراصير .. مانا عملت فيهم الي ميتعملش في 30 سنه محدش قال لا ولا فتحوا بقهم .. ايه الي جد يعني .. 

- انت شايف كده يعني يا ريس ؟! 

- شوف شغلك انا مش كل يوم هقعد ااقولك تعمل ايه ومتعملش ايه .. انا داخل عالتسعين ومبقتش حمل مناهده .. 

- حصل يا ريس ... 


                                                                               يتبع .. (:
Twitter Bird Gadget