الأحد، ٢٨ نوفمبر ٢٠١٠

بيان رقم 5 .. قصه كفاح .. (:

بناء علي طلب الجحافل العظيمه الي بعتتلي علي الميل عشان اكتب عن تلك المرحله التاريخيه في حياتي .. قررت اني اشارك معاكم القليل من الزكريات والمواقف الي حصلتلي علي مدي 22 عام من العطاء منقطع النظير ...

التعليم هو العمود الفقري المكون لشخصيه كل بني ادم فينا .. وعن طريق الاحتكاك بالاخرين في تلك المرحله العمريه بتبدا شخصيه الهلف الي عايش ده في التكون ومن ثم التطور للوصول الي اعلي مراحلها في سن ال 40 .. واحد لذيذ ( بلاش ظريف عشان الناس اشتكوا ) هيقولي انت مالك قلبت علي ابراهيم الفقي كده ليه .. مانت مش لازم تبقي بني ادم هايف داخل المدونه عشان تستعرض خفه دمك يعني ... لازم يكون ليك (اتجاه) ووجه نظر في الحياه زي وجهه نظر محمد صبحي كده ..

المهم ان الواحد بدات رحلته في التعليم من اول ابتدائي .. مرحله البراءه والطفوله وبكار وماما ساميه وكابتن ماجد وكل الحجات الي جابت عته للشعب المصري الغلبان .. الصراحه راحه المرحله دي لا تستحق الذكر لانها كانت كلها تافها وحجات كده ملهاش صنف اللازمه ...

نيجي بقي لمرحله الاعدادي .. بدايه التخبط ووضع اولي الخطوات في طريق الضياع والانحلال ... في المرحله دي الواحد بينتقل من مرحله البراءه لمرحله الشاب الفاجر الي عايز يلفت الانظار ليه وكل الحورات الفاشله دي .. طبعا هو مش هيقدر يلفت الانظار ليه حتي لو عمل نفسه شكوكو .. بس دي مجرد بدايه ومجموعه من المحولات الفاشله .. بيخرج منها البني ادم ( ده ان خرج يعني ) بالعديد من العقد النفسيه وبعض الاضرار الجسديه الكافيه بان البني ادم ده ينتحر * ويريح المجتمع منه " راجع اخر الموضوع " ...

نيجي بقي للمرحله الي بعد كده

ثاااااااانويه عامه بقي يا معلم وسجاير وحريم وكل الي نفسك فيه ...

طبعا ده الي انت فاكره يا عم الظريف .. بعد مرحله البوظان الفاشله في اعدادي هتحاول تثبت وجودك في ثانوي .. مع الكثير من التغيرات الفسيولوجيه والفيزيائيه هتعمل معاك احلي شغل ...

طبعا انت فاكر ان الحكايه بقت وردي وان ثانويه عامه بقي هي بدايه الانفتاح علي العالم الخارجي الفوشياك الي فيه كل حاجه ولا الجبنه الرومي ..

لا يا عم الفاجر ... :(

ثانويه عامه دي عباره عن سنتين من الكبت والقهر والضغوط باختلاف انواعها واشكالها الي بتتحط عليك ولا كانك الشحات مبروك وداخل بطوله البحر المتوسط في كمال الاجسام وانت وزنك 45 كيلو ...

الناس كلها مستنيه منك الكتير .. تبقي احمد زويل ولا مجدي يعقوب ولا شيكابلا حتي ..

عشان كده خدها نصيحه من اخوك الكبير .. حاول تسيب بصمتك .. حلوة وحشه بقي مش مشكله .. المهم تسيب بصمه


علي سبيل المثال
1-تجيب 99 % وتقول لاهلك انك مش عايز طب وانك عايز تدخل سياحه وفنادق وابوك يجيلو فيها جلطه وياخد استماره 6
2- تجيب 59 % ومتلحقش اي ابن كلب ووانت بتملي الرغبات تحط اول رغبه صيدله "    "     "      "    "   "    استماره 6
3-تبدا تشرب سجاير .. ولو عرفت تتصرف في حشيش يبقي تمام وبعدين ابوك يقفشك "  "     "       "    "   "    استماره 6
4-انضم لخليه ارهابيه وقبل الامتحان اخبطلك جلابيه نضيفه واطلع علي افغانستان و  "    "    "       "     "   "   استماره 6

وعلي هذا المنوال حاول باكتر من  طريقه تسيب بصمتك لان الي هتشوفه بعد كده مش شويه .. 


الكليه ...

المرحله الي هتحس فيها ان عمرك راح هدر :( 

الكليه دي 6 مراحل لازم اي شاب يمر بيها

المرحله الاولي : عبد الحليم بقي وام كلثوم وتامر وجل في شعرك وعيش اللحظه يا معلم
المرحله التانيه : عكس الي فوق خالص .. محمد حسنين يعقوب ومحمد حسان دقن وجلابيه قصيره وكام يوم في المعتقل
المرحله التالته : محضرات وسكاشن ومزاكره من اول السنه ( طبعا لانك اتحط عليك السنه الي قبلها ) ويادوبك تطلع بمادتين :)
المرحله الرابعه :حزب الكرامه وحركه كفايه ايمن نور الاخوان المسلمين جمال مبارك وابو تريكه ..
المرحله الخامسه : انا عايز اتجوز :) محدش عندو عروسه
المرحله السادسه: يااااااااااااااااااااا رب ملبسش جيش :( البت ابوها مهيصدق وهيرجعلي الشبكه امو اربعتلاف جنيه ويقولي روح عند **** :(

وبعد متعدي بالمراحل السته دي ( واحد ظريف هيقول 6 ازاي والكليه 5 بس .. ااقوله هنشوف يا حيلتها وابقي قابلني لو خلصتها في 8 مش 6 ) هتتخرج بعد كده عشان تواجه الواقع المرير .. وتكتشف ان كل الي فات ده كانت البلد بتلعب معاك حيلهم بينهم :)

بص يا عم انت هتتخرج مش هتلاقي شغل .. ولو لقيت هيطلع عينك انت والي متجوزها والي مخلفهم معاك .. وفي الاخر هتوصل لنفس النتيجه الي انت وصلتلها في اعدادي بس انت مش قادر تقتنع (راجع المرحله الاعداديه البراجراف التاني) .. مــــــــــــــــــــــــــــــــــــــــــفيش فايده .. بس كده :)

السبت، ٢٧ نوفمبر ٢٠١٠

بيان رقم 4 .. حلواني اخوان .. (:

النهارده كان عندي سكشن متاخر شويه .. الساعه تلاته .. واحد ظريف هيقولي هو في حد بياخد سكاشن متاخر كده ! هقوله انا مال امي اسال العميد بتاع الكليه .. المهم اني قمت من السرير بعد محاولات مضنيه .. زي مابويا بيقول ديما احلي حاجتين في الدنيا دي النوم وحاجه كمان مش هيبقي ظريف التعرض ليها الان  .. المهم اني قومت غسلت وشي وصليت وظبط الاداء وعملت حاجه اكولها مع كوبايه قهوة بن فاتح محوج من ابو زيد الربع كيلو ب 14 جنيه .. بفتح التلفزيون عشان اشوف الدنيا فيها ايه .. المهم التلفزيون فتح علي روتنا سينما لانها كانت شغاله من امبارح .. مرورا ب ميلودي ومزيكا والحياه ودريم وناشيونال جيوغرفك وصلت الحمد لله لقناه الجزيره بعد ساعه ونص كده ... كان علي الجزيره حوار ظريف جدا .. واحد معوق كده من الحزب الوطني .. وواحد معوق بردو من الجماعه المحظورة ( اللهم احفظنا ) وواحد كمان ملوش صنف اللازمه قاعد بيسخن الليله ويوقع الجوز في بعض .. وواحده ست  موزه شبه المزيعات بتوع ال LBC متفهمش ايه الي جابها في الليله دي ... المهم ان الراجل بتاع الحزب الوطني قاعد طبعا يمجد في الحكومه وعمال يعدد في الانجازات العظيمه الي الحكومه بتاعتنا ..

وقد قامت الحكومه بتوفير فرص عمل للشباب .. اكتر من 20 الف فرصه عمل حضرتك وبمرتب ميحلمش بيه اي شاب لسه بيبدا حياته .. 300 جنيه حضرتك

اما بالنسبه للمواطن البسيط .. فالحكومه ماكنتش بتنام ( واضح ) الا لما توفر لكل مواطن عيشه كريمه .. من اول انابيب البوتجاز امو 20 جنيه لكيلو السكر المدعم ابو 4 جنيه للطماطم امو 10 جنيه ..

الفلاح البسيط طبعا من اهم اولاويتنا ( مش عارف انا كاتبها صح ولا ايه ) حضرتك شوف كل فلاح دلوقتي بقي عنده دش بقمرين .. والي معندوش شادد وصله

الميه دلوقتي بقت متوافره وبغزاره في بيت كل مواطن وباجر رمزي ( مع العلم اني قاعد ساعتين الصبح مزنوق في الحمام عشان الميه قاطعه ) زمان حضرتك مكنتش الصرف الصحي مغطي 20 % من البلد .. lol 


كل ده حضرتك ضمن البرنامج الانتخابي للسيد الرئيس الي كلنا بنعمل تحت قيادته ... مع اغنيه ماشفش الامل شغاله بصوت واطي في الخلفيه ..

بعدها اتكلم بتاع الاخوان .. مع ملاحظه غريبه جدا

الراجل الي بيتكلم باسم الحزب الحاكم كان مربي دقنه .. والي بيتكلم باسم الجماعه المحظوره دقنه ولا السيراميك الي لسه مغسول بفنيك

متفهمش مين بيضحك علي مين

بتاع الاخوان بقي كان بوب .. بايع القضيه .. الصراحه الراجل قال كلام معرفش ازاي قدر يقوله .. اينعم تلات تربع كلامه مكنش مفهوم قوي

بس انا حسيت انه كلام زي الفل ..

كل ده وانا قاعد مستني الموزه تتكلم

لكن في الاخر المزيع قال .. نكتفي اعزائي المشاهدين بهذا القدر من الحوار ونستكمل الحوار مع باقي ضيوفنا بعد نشره الرابعه بتوقيت المملكه العربيه السعوديه ... الي اللقاء

وهكذا اصابني احباط شديد طول اليوم وحسيت ان البلد دي عمرها مهتتقدم طول ماحنا بنضطهد الحريم بتوعنا كده  :D


وشكرا

(:

الجمعة، ٢٦ نوفمبر ٢٠١٠

بيان رقم 3 .. اذا اراد الشعب الحياه يوما ... (:


طبعا بعد الاقبال الشديد علي المدونه بعد بيان 1 وبيان 2 وبما اني ضربت الرقم القياسي في المدونات الحديثه ب 0 كومنت و 0 فولورز 

فانا قررت اني اتحف نفسي بالبيان التالت الي محدش هيقراه انا عارف بس اهو بنعمل الي علينا والارزاق علي الله .. (: 

امبارح روحت البيت كده علي الساعه 1 وقعدت عالنت شويه اشوف الدنيا بيحصل فيها ايه واخنق علي الكام بني ادم الي عندي عالميل لحد مالفجر ادن .. صليت وبعدين نمت .. وبعدين حلمت حلم عجيب كده عامل زي مسائل الفيزياء بتاعت ثانويه عما مستحيل يتفهم ... وفاجاه صحيت علي صوت بيقول كااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااافر .. انا قومت مخضوض وقولت بس انا في جهنم وش .. مانا اصلي الي عملته في حياتي مش شويه :(   المهم بعد 5 دقايق كده من اللاوعي استوعبت ان النهارده الجمعه وان الي بيقول كافر في ودني ده الشيخ الي في الجامع الي جنبنا .. هوبا دخلت احمام عشان اتوضي وكالعاده مكنش في ميه .. المهم اني اتصرفت يعني ولبست علي طول ونزلت عشان الحق الصلاه .. لسه جاي بحط رجلي جوا الجامع لقيت الشيخ بصلي كده بصت احتقار من فوق المنبر روحت انا عملت نفسي من بنها .. المهم لسه جاي بقعد لقيت الشيخ بيقول ايه .. وبالنسبه بقي للناس الي بتيجي متاخره .. احب ااقولهم صلاتك باااااااااااااااااااااااااااااااااااااااااااااااااااااااااااااااااااااااااااااااااطله .. وان الشيخ لو صعد المنبر يبقي مينفعلكش صلاه وتروح تصلي في بيتكم احسن .. دقيقه من الصمت التام والجامع كله بيبصلي وبعدين كسر الصمت شيء عجيب جدا ... لقيت الشيخ اسم النبي حارصه وصاينه بيقول ايه .. وبما ان الانتخبات الجايه يوم الحد .. فاحنا لازم كلنا نروح نصوت لان صوتك امانه .. وابني بيتك يابن بلدي ... وطبعا كلنا لازم ندي صوتنا لابن البلد مش لحد غريب ابن البلد ده الي هو احمد عبد الدايم مرشح الحزب الوطني الحاكم .. 

انا سمعت الكلمه من هنا وقولت اااااااااااه يا باااااالد .. حتي شيوخك مش تمام .. طيب انت المفروض انك شيخ توعظ الناس .. مالك انت ومال الانتخبات ! وانا ياخي مبحبش الحزب الوطني .. ( والله مانا يا بيه ) .. ومش عايز انتخب الراجل الحرامي الي انت بتقول عليه ده ! 
ليه تحط نفسك في موقف زي ده  ؟ولا هي تعليمات جيالك من فوق عشان الراجل بتاع الحزب يكسب يعني ؟ وبعيدن مهو كده كده الي هم عايزينه هيكسب  .. ايه لازمه بقي النفاق والرياء الي انت عايش فيه ده ؟ وشكرا  ..

الخميس، ٢٥ نوفمبر ٢٠١٠

بيان رقم 2 .. الهنص في الدنص (:



النهارده قررت اني ازكي عن اموالي واتخلي عن 15 جنيه من حر مالي وادخل السينما .. 

جمعت العيال الفشله صحابي بعد مخلصنا السكشن ورغم الشاب الذيذ الي معرفوش الي رشق معانا الا اننا قررنا ندخل فيلم احمد حيلمي بولبول حيران  (:

طبعا السينما دلوقتي يعني احمد حلمي واحمد مكي .. الاتنين الي ممكن الواحد يفكر يدخلهم فيلم غير كده الباقي فكسان قوي ياما استظراف ملوش لازمه ياما كل واحد فاكر نفسه المفتش كرومبو ويعملك فيلم فيه فكره متخلفه زيه عشان الناس تدخلوا .. 

المهم دلوقتي اننا دخلنا الفيلم والحياه كانت زي الفل .. اينعم كان شكلنا وحش قوي لان السينما كان كلها كابلز .. كل واحد ماسكله واحده وقاعدين يزاكروا احياء .. واحنا 4 رجاله شكلنا مكنش ظريف خالص 

بس مش معني ان الواحد معرفش حريم غير امه واخته والست الي بتيجي تنضف البيت يوم الارباع يبقي ندفن نفسنا يعني ومندخلش سينما 

المهم خدنا 4 كراسي في النص كده ورا اتنين قاعدين بيزاكروا بردو بس بصوت واطي شويه عشان نقدر نركز مع الفيلم 

 المهم بقي والي خلاني اكتب البتاعه دي مش الفيلم بتاع حلمي 

لكن الاعلان الي اشتغل قبل الفيلم ميبدا 

الاعلان كان لفيلم اسمه بون سواريه .. بطوله غتده عبد الرازق ومجموعه من ال.... تحت رعايه راعي الفساد الاول السبكي الي بيسرح الناس دي 

الواحد في ال22 سنه الي عاشهم شاف حجات مقرفه كتير .. لكن اول مره اشوف فيلم مقزز بالصورة دي 

اعلان الفيلم فيه كميه سفاله وقله ادب ورخامه وتباته واستظراف .. ضرب الرقم القياسي الي متسجل باسم برنامج سيد او حفيظه الي معرفش الناس بتتفرج عليه ازاي

المهم الاعلان ده خلاني اسال نفسي سؤال عويص مش عارف اجابته .. 

هو احنا رايحين علي فين ؟ 

الناس دي عايزه ايه مننا ؟؟ 

وياتري مين الي عايز الشباب يبقي مغيب وتافه بالطريقه دي ؟ مين المسئول عن حاله الضياع الي الشباب بقي عايش فيها دي ؟ 

طيب ايه الحل  ؟ والغلط علي مين ؟ علي الي بيقدم البضاعه الرخيصه دي ؟ ولا علي الشباب الي بيجري ورا الهلس والمسخره ومش دريان بالي بيحصل حواليه ؟ 

طيب هو مين الي خلاه مش دريان بالي بيحصل حواليه ؟ 

اساله كتير واجوبه قليله جدا لان محدش مهتم اصلا غير بالكورة والحشيش الي مبقاش موجود في البلد

واحد هيقلي انت قلبتها درامه كده ليه وبقيت تتكلم زي العيال بتوع مدونه المصريون قادمون والحركه الوطنيه المستخبيه من اجل الاصلاح والتغيير  ؟ 

ااقولك لا يا عم الظريف انا مش حزب وطني ولا اخوانجي ولا من حركه 6 ابريل .. انا يس كان جوايا احساس بيستفزني اني اكتب كده لاني مش عارف البلد دي رايحه علي فين واخرتها .. ايه ! ..

الأربعاء، ٢٤ نوفمبر ٢٠١٠

بيان رقم .. 1 عم كااامل .. (:



باشاااا :) 

النهارده كان يوم ظريف لطيف جدا .. صحيت الصبح الساعه 7 كده وقولت يا فتاح يا عليم يا رزاق يا كريم استعنا بالشقا علي الله 

طسيت وشي بشويه ميه ويادوبك نزلت من البيت بسرعه عشان الحق الكليه عشان اتخرج وابقي دوكتور قد الدنيا زي مامي ديما تقولي 

المهم يا سيدي عديت علي عم كامل بتاع الطعميه الي بقاله بتاع 20 سنه شايفني رايح جاي بالبلطو والكتب لحد مالراجل فقد الامل انه يشفني متخرج من الكليه قبل ماموت .. المهم يعني دار بيني وبينه حوار لذيذ رغم اني مكنتش لسه صحيت .. وكان الحوار كالاتي 

عم كامل : دوكتوووووووووووووووووووووووووووووور .. اتفضل يا باشا 

انا : ازيك يا عم الحاج اخبارك ايه .. معلش اصلي مستعجل عشان ورايا سكشن ومتاخر .. 

عم كامل : يا دوكتور مش هاخد من وقتك دقيقه .. 

انا طبعا عارف انه راجل سئيل ومش هيسكت غير لما يطلع عين الي خلفوني ويقعد يحكيلي ماساه حياته وانا اشيل السنه عشان ينبسطت 

انا : خير يا عمونا في ايه 

عم كامل : امبارح بليل حسيت بوجع جامد في جمبي .. 

انا : الف سلامه يا عم كامل 

عم كامل : ولما دخلت الحمام .. لامواخده حسيت بامساك شديد .. 

انا : انجز يا عم بقرف امك ده 

عم كامل : الفكره اني عندي السكر من حوالي سنتين كده والدكتور كاتبلي اماريل بس مش مستريح عليه ... 

انا : الصبر من عندك يا رب 

عم كامل : بيقولو يا دكتور ان الراجل الي نازل حزب وطني اترفع عليه قضيه واتحول من فئات لعمال عشان مراته كانت رافعه عليه قضيه نفقه .. 

انا : انجززززززززززززز ابوس جزمه امك 

عم كامل : والله يا دوكتور كيلو الفول غلي والطما .. 

انا مستقطبا .. ( تقريبا بتتقال كده ) : ايوة خير ياعني يا عم كامل كنت عايز مني ايه

عم كامل : الصراحه يا دوكتور انا بقالي كام يوم حالتي النفسيه مش متظبطه 

انا : اطلعلك يومين الساحل يا عم كامل وهتبقي زي الفل

عم كامل : لا انت مش فاهمني يا دكتور .. انا قصدي ال .... احنا شباب زي بعض وانت اكيد فاهمني ;)

انا : شباب ايه الله يخربيتك ده انت قد جدي وبعدين مسائل ايه يا عم كامل .. المفروض تعمل حاجه لاخرتك انت لسه عندك امل ده انا 22 سنه وبدات افقد الامل .. 

عم كامل : طيب يا دوكتور متشوفلنا حاجه كده ولا كده تخلي الواحد يرجع 20 سنه لورا .. 

انا : انت فاركني عم حوزومبل يا راجل يا شايب .. ده انا بقالي 7 سنين مش عارف اتخرج من ام الكليه 

طبعا الحوار كان ممكن يمتد لاكتر من 10 ساعات بس حقنا للدماء قولتله حاضر يا عم كامل هجبلك حبايه تخليك ولا الشمبانزي الاسترالي في وسط حشائش السافانا .. 

استمرت رحله الكفاح لحد موصلت للمنطقه الي بمارس فيها رياضتي المفضله 

الجري ورا الميكروباصات .. 

طبعا لما يبقي في حوالي 200 واحد واقف .. وكل ربع ساعه يجي ميكروباص .. الناس بتهجم عليه زي مبتهجم الكلاب الضاله علي اي كلبه معديه بليل حتي لو جربانه 

طبعا السواق بيحجز الكرسيين الي قدام كجايزه لاجمد موزه عالموقف اما بقي البنات الوحشه او الرجاله الي زي حلاتي كده مفمفيش حل الا الصراع من اجل البقاء 

في الاول كده لازم تعرف شوايه قوانين عشان تحسن فرصك من انك تركب وتوصل متاخر عن معادك نصايه مثلا او ااقل حسب تطبقيك للتعليمات وبردو فيها نسبه حظ زي كوره بركات التانيه في الجزاير كده .. المهم .. 

1- لو شوفت حد تعرفه علي الموقف حتي لو امك شخصيا .. لاوم تودي وشك الناحيه التانيه ولا كانك شايفه .. لان فرصه ركوب الفرد الواحد اعلي من الفردين ب نسبه تفوق ال 70 % 
2- متاخدكش رحمه او شفقه بالحريم .. لانهم لو جتلهم فرصه هيحطوك تحت رجليهم .. والي يقرب منك ارزعه بكوعك لحد ميتعور او يتخانق معاك وتطلعوا علي القسم وتعملك قضيه تحرش وتلبس 3 سنين 
3- حاول ديما تبعد عن الناس الكبيره عشان ديما بيبقي دماغهم مفوته وبيبقوا عايزين اي حد يفشوا فيه غلهم .. 
4- حاول ديما تدوس علي رجلين الي حواليك .. ده بيعطلهم بنسبه 10 % 
5- حاول ديما تقعد جنب الشباك في الكرسي الي قبل الاخير .. عشان تبعد عن لم الاجره وعشان لو قعد الكرسي 4 متتزنقش انت يا خفيف .. 
6- رضي الاب والام .. متنساش ان التوفيق مهم جدا زي مقولتلك .. 

المهم بما اتي بقيت مخضرم .. ( حلوة مخضرم دي ) .. ركبت في حوالي تلت ساعه كده ووصلت الكليه بعدها بنص ساعه الحمد لله 

طبعا المعيده مرضيتش تاخد غيابي بس الحمد لله خليت واحد صاحبي كان دفعتي بس ربنا كرمه واتعين معيد ياخدلي الغياب بعد مغمزته بسجرتين .. 

المهم خلصنا السكشن وفضلت قاعد انا والعيال الفشله الي انا مصاحبهم  والي علي طول امي بتقولي محدش جايبك ورا غيرهم 

الكليه مبقتش كليه يا جدعان والله .. البنات بقوا حاجه فظيعه مش عارف الناس دي عايزه ايه مننا .. تلاقي البنت لابه المحزق والملزق ولو اتعاكست ولا حاجه تعملك فيها خضرا الشريفه .. طيب لما انتي عامله فيها محترمه يبقي كملي جميلك والبسي حاجه محترمه عشان انا احترمك 

بس ارجع واقول الغلط مش عليها الغلط علي البقف الي سايبك تنزلي كده من بيتكوا

متبصليش كده وتقولي انت مال اهلك .. دي المفروض جامعه مش كابريه يا عم السيس .. ومش عشان انت زانقلي بت طول النهار عند الورش بتاعت هندسه يبقي تعملي فيها تامر امين ... 

المهم كفايه كده عليكوا النهارده عشان في ماتش بين نادال وجيكوفيتش ونفسي الواد ابو قصه ده يتغلب .. 

سلامو عليكو (:







الثلاثاء، ٢٣ نوفمبر ٢٠١٠

سلامو عليكو ... (:


بسم الله الذي لا يشرك مع اسمه شيء في الارض ولا في السماء .. بسم الله الرحمن الرحيم

ازيك يا عم الحاج  (:  متبصليش كده وتقول ماله الراجل ده اتهبل في نفوخه ولا ايه .. دي اول مره اكتب في مدونه لاني ببساطه شايف ان البلوجرز دول شويه عيال هايفه مش لاقيين حاجه يعملوها 

وبما اني عندي فراغ عاطفي الايام دي .. فانا قررت قرار لا راجعه فيه اني ابدا ادون قصه كفاحي عشان العالم يستفيد بيها 

هتبصلي تاني وتقولي ماله الواد الي اتهف في نفوخه ده وفاكر نفسه عمر الشريف .. هقولك ملكش دعوة يا عم الظريف 

انا هكتب الي انا عايزه واي حاجه تيجي علي دماغي .. وبما اننا في بلد ديموقراااااااااطي .. فانا بحب الحكومه  :D وبحب النادي الاهلي وبكره الاخوان المسلمين وماشي جنب الحيط واتهد بقي عشان الحيطه ليها ودان ومتستفزنيش عشان اتكلم عن الي بيحصل في البلد عشان ابويا طلع تلاتينه عشان يعلمني ويربيني احسن تربيه .. خلينا ساكتين احسن الله يكرم اصلك .. 

جدع بتسمع الكلام .. وطول مانت بتسمع كلامي ومحترم نفسك هتاخد مني احلي شغل .. هارش ؟ 

المهم يا عم الحاج متركزش معايا في اللغه العربيه شعان انا مكتبتش عربي من ايام مكنتش في تالته ثانوي  من ايام مكر مفر مقبل مدبر معا .. لحد الطور الاحمر ابو قرن الي اتجوز بقره بني من غير قرن فخلفوا شامبنزي لونه فحلقي متفهمش ازاي 

المهم يعني تقرا وانت ساكت الله يكرمك ولو عندك كلمه حلوه قولها معندكش يبقي تسمعنا سكاتك الله يكرمك عشان انا عندي سكشن الصبح الساعه 9 وعشان اوصل الكليه 9 لازم انزل من بيتنا 7 ونص عشان ابدا رحله الكفاح بدايه من ركوب الميكروباص للسرفيس لحد ماوصل الكليه عشان في الاخر المعيد يهزقني ويقولي اطلع بره يابو دماغ مش واخدلك الغياب 

كفايه عليك لحد كده النهارده ولو اني عارف ان محدش هيقري ام الخرف الي انا كاتبه بس بس اهو الواحد قال الكلمتين الي مزنوق فيهم وامره لله 

نلتقي بعد الفاصل .. 

(:


Twitter Bird Gadget