الاثنين، ٧ مارس ٢٠١١

بيان رقم 23 .. السواق والبرص (:

 
  • فاضي يا باشا ؟ 
  • رايح فين ان شاء الله ؟ 
  • مستشفي الجاويش ان شاء الله 
  • طيب اركب 
  • السلام عليكم 
  • وعليكم السلام .. تدخن يا باشا 
  • ربنا يخليك مبدخنش 
  • احسن والله .. هو الواحد جابه ورا غير التدخين 
  • اه والله مشكله .. طب لو ممكن تطفي السجاره
  • حاضر يا باشا هطفي بره 
  • ومالو ... 
  • عارف يا باشا ؟ 
  • لا والله معرفش 
  • انا بدخن بقالي 30 سنه .. وعمري ماشتكيت من مرض  عشان خاطر السجاير 
  • ربنا يديك الصحه 
  • اه والله زي مبقلك كده انا عندي فيرس سي وبي وعندي عين مبقتش بشوف بيها خالص وعين بشوف بيها طشاش ورغم كده صحتي زي البمب 
  • طب الحمد لله 
  • ربنا ينتقم بقي من الي كان السبب ..  اكلونا عيش متسرطن وميه مطينه علي دماغتهم ..يلا الحمد لله اهم غاروا ...
  • الحمد لله 
  • عارف يا بيه .. انا كنت طافح الكوته العشرين سنه الي فاتم كنت بعمل في اليوم بتاع 100 جنيه بدفع نصهم بنزين النص التاني لامين الشرطه ابن المكعبره عشان ميرزعنيش مخلفات بخمستلاف جنيه كل ماجي ارخص 
  • معلش يا حج اهم اختفوا والبلد بقت ميغه .. هيص يا عم 
  • الناس يا باشا مش متعوده عالاحترام .. عايزه الي يديها علي دماغها يعني شوف ابن الغبيه الي كاسر الاشاره ده .. هيخس يعني لما يستني ال 30 ثانيه دول ؟ عالم ولاد ***
السواق عدي قبل مالاشاره تفتح ب 10 ثواني .. عادي خالص :D
  • عارف يا بيه .. الواد محسن ابني عقبال عندك في كليه تجاره ... داير طول النهار في المظهرات ..  ااقولو ااقعد زاكرلك كلميتن يابن الفاشله .. يقولي يعني هم الي زاكروا عملوا ايه .. مطلع عيني والله 
  • ربنا يخليهولك 
  • امبارح وانا معدي من قدام امن الدوله كان في لبش .. نزلت اشوف في ايه لقيت الناس دخلوا جواه والي لحق ياخد حاجه ياخدها دخلت معاهم يا باشا لقينا اوضه مدفون فيها حوالي خمستلاف واحد كلهم عضم وجماجم .. وريحتهم ايه مقولش زي الزفت 
  • يعني هي دي كل مشكلتك الريحه المهببه علي دماغك 
  • لا طبعا مش الريحه بس .. دخلنا بعدها علي المكتب لقينا الظابط جواه ... مسكته من القميص بتعه كده وخبطه بالقفا زي مبتخبط البرص كده .. ومقدرش يقولي لا
  • عفارم عليك والله ... ابقي قول بقي الحوار ده لمراتك عشان تنبسط منك .. النهارده الخميس انت عارف 
  • هههههههع .. خميس ايه باشا كل سنه وانت طيب ... احنا كبرنا عالكلام ده 
  • ومالو يا سيدي ربنا يديك الصحه ... علي جنب بقي هنا لو سمحت .. اتفضل ..
  • ناقص نص جنيه كده يا باشا .. 
  • نص جنيه ايه هو مفيش غير الجوز جنيهات دول لو عاجبينك ! 
  • عاجبني يا عم غور الله يقرفك ...
قال الكلمه وجري الكلب قبل مالحقه  :D 
Twitter Bird Gadget